بەپێی هەواڵی کوردپرێس، پێشنيوه‌ڕۆى ئه‌مڕۆ سێشه‌ممه 2022.11.15 نێچیرڤان بارزانی سەرۆکی هەرێمی کوردستان لە کۆبوونه‌وه‌يه‌کدا لەگەڵ سەرۆک کۆماری عێراق؛ دووباره پيرۆزبايى لە ناوبراو کرد بۆ ده‌ستبه‌کاربوونى و هيواى سه‌رکه‌وتنى بۆ خواست، هه‌روه‌ها ئاماژه‌ى به‌وه دا: چاوه‌ڕوانيمان هه‌يه که به‌پێى ئه‌و ده‌رفه‌ته‌ى هه‌يه له پێگه‌ى خۆتانه‌وه ڕۆڵ ببين له چاره‌سه‌رکردنى کێشه‌کان.
بارزانی هه‌موو ئاماده‌يى و پشتگيريى هه‌رێمى کوردستانيشى دووپات کرده‌وه بۆ چاره‌سه‌رکردنى کێشه‌کان له‌گه‌ڵ به‌غدا و پێکه‌وه‌کارکردن له‌گه‌ڵ حکوومه‌تى فيدراڵى له‌پێناو ئارامى و سه‌قامگيريى وڵاتدا.
لاى خۆيه‌وه‌سه‌رۆک کۆمارى عێراق، وێڕاى ده‌ربڕينى سوپاسگوزارى بۆ پێشوازى و پشتيوانيى نێچيرڤان بارزانى، هيواى خواست به هاوکاريى هه‌موو هێز و لايه‌نه سياسييه‌کانى عێراق، بتوانن پێکه‌وه کار بۆ چاره‌سه‌رکردنى کێشه‌کانى هه‌ولێر ـ به‌غدا و کێشه‌کانى ديکه‌ى وڵات به‌گشتى و پاراستنى ئارامى و ئاسايش بکه‌ن.
له کۆبوونه‌وه‌که‌دا که شێخ جه‌عفه‌ر شێخ مسته‌فا جێگرى سه‌رۆکى هه‌رێمى کوردستان ئاماده‌ى بوو، هه‌ردوولا داکۆکييان له‌وه کرده‌وه که تێگه‌يشتنى هاوبه‌شى نێوان هه‌ولێر ـ به‌غدا کليلى ئارامى و سه‌قامگيريى وڵاته، هه‌روه‌ها ده‌رباره‌ى دۆخى ناوچه‌که به‌گشتى و چه‌ند بابه‌تێکى ديکه‌ى جێى بايه‌خى هاوبه‌ش، بيروڕايان گۆڕييه‌وه.
Your Comment