کوردپرێس:

ڕۆژی سێشەممە 30ی تەمووزی 2019 فالح فەیاز، سەرۆکى دەستەى حەشدى شەعبى لە کۆنگرەیێکى رۆژنامەوانیدا هەڵوەشاندنەوەى نووسینگەکانى حەشدى شەعبیى لە سەرجەم پارێزگاکان و گواستنەوەى کارمەندان و کەرەستەکانى بۆ دەستەیێکى هاوشێوەى سەر بە وەزارەتى بەرگرى و دەزگاى بەرەنگاربوونەوەى تیرۆر ڕاگەیاند.

فالح فەیاز داوای ماوەیێکی کردووە بۆ جێبەجێ کردنی فەرمانەکەی عەبدولمەهدی و ئاماژەى بەوەش کردووە لەبارەى تەواوى سەربازگەکانى حەشد و شوێنى مانەوەى چەکدارەکان فەرمانى دیوانی دەرچووە کە رێکخستنەوەى ئەو تەواوى رێکارەکان دوو مانگى دیکەى پێویستە.

بڕیارى هەڵوەشاندنەوەى نووسینگەکانى حەشدى شەعبى دواى بڕیارەکەى عادل عەبدولمەهدى فەرماندەى گشت هێزە چەکدارەکانى عێراق دێت تایبەت بە تێکەڵ­کردنەوەى چەکدارانى حەشد و فەرماندەکانیان بە هێزەکانى سوپا و رێکخستنەوەیان لە چوارچێوەى وەزارەتى بەرگریی حکوومەتى فیدراڵ.