کوردپرێس:

ڕۆژی هه‌ینی 19ی ته‌مووزی 2019 محه‌مه‌د جه‌واد زه‌ریف وه‌زیری ده‌ره‌وه‌ی ئێران له ‌چوارچیوه‌ی سه‌ردانه‌كه‌یدا بۆ نیویۆرک له‌گه‌ڵ ئه‌نتۆنیۆ گۆترێس سكرتێری گشتیی نه‌ته‌وه‌ یه‌كگرتووه‌كان كۆ بووه‌وه‌ و تاوتوێی ئاڵۆزییه‌كانی ناوچه‌كه‌ و كشانه‌وه‌ی قۆناغ به ‌قۆناغی ئێران له‌ ڕێككه‌وتننامه‌ ئه‌تۆمییه‌كه‌ و ده‌ستبه‌سه‌رداگرتنی كه‌شتییه‌ نه‌وت گوێزه‌ره‌وه‌كه‌ی ئێرانیان له ‌ناوچه‌ی جه‌به‌ل تارق کرد.

له ‌به‌شێكی دیكه‌ی ئه‌و كۆبوونه‌وه‌یه‌دا وه‌زیری ده‌ره‌وه‌ی ئێران و سكرتێری گشتیی نه‌ته‌وه‌ یه‌كگرتووه‌كان گفتوگۆیان له‌باره‌ی ئه‌و كۆتوبه‌ندانه‌ كردووه‌ كه‌ ئه‌مریكا به‌ سه‌ر كارمه‌ندانی نێرده‌ی ئێران له‌ نه‌ته‌وه‌ یه‌كگرتووه‌كان سه‌پاندوویه‌تی.

شایانی باسه‌؛ ڕۆژی یه‌کشه‌ممه‌ی ڕابردوو 14ی ته‌مووزی 2019 محه‌مه‌د جه‌واد زه‌ریف به‌ مه‌به‌ستی به‌شداری له‌ کۆبوونه‌وه‌ی ئه‌نجومه‌نی ئابووری- کۆمه‌ڵایه‌تیی ڕێکخراوی نه‌ته‌وه‌ یه‌کگرتووه‌کان گه‌یشته‌ نیۆیۆرک و دوای به‌شداری له‌و کۆنفڕانسه‌ و کۆبوونه‌وه‌ له‌گه‌ڵ به‌رپرسانی باڵای نه‌ته‌وه‌ یه‌کگرتووه‌کان ڕۆژی هه‌ینی 19ی 7ی 2019 نیۆیۆرکی به‌ره‌و کاراکاس پێته‌ختی ڤێنزۆئیلا به‌جێهێشت. نیکاراگۆئه‌ و بۆلیڤی دوایین شوێنی مه‌به‌ستی سه‌ردانه‌که‌ی زه‌ریف ده‌بێت.

کۆدی هه‌واڵنێر: 60103