به‌پێی هه‌واڵی کوردپرێس، ئه‌مڕۆ پێنجشه‌ممه‌ 18ی ته‌مووزی 2019 فڕۆکه‌ جه‌نگییه‌کانی سوپای تورکیا گوندی خه‌لیفانی هه‌ڵکه‌وتوو له‌ ده‌ڤه‌ری برادۆستی هه‌ولێریان به‌ توندی بۆردومان کرد و شوانکاره‌کانی سنووره‌که‌ی ناچار کرد ده‌ست له‌ له‌وه‌ڕاندنی ئاژه‌ڵه‌کانیان به‌ر بده‌ن و بڕۆنه‌وه‌ ماڵه‌کانیان.

بۆردومان‌کردنی ناوچه‌که‌ له‌لایه‌ن فڕۆکه‌کانی تورکیا سووتاندنی پۆش و پاوانی ناوچه‌که‌ی لێکه‌وته‌وه‌ به‌ڵام هێشتا هیچ زانیارییێکی له‌باره‌ی زیانه‌کانی هێرشه‌که‌وه‌ بڵاو نه‌کراوه‌ته‌وه‌.

تورکیا به‌ بیانووی بوونی گه‌ریلاکانی پارتی کرێکارانی کوردستان جگه‌ له‌ به‌زاندنی سنووری هه‌رێمی کوردستان و بوونی چه‌ندین پێگه‌ و مۆڵگه‌ی سه‌ربازی به‌ به‌رده‌وامی بۆردومان و تۆپبارانی گونده‌کانی هه‌رێم ده‌کات و تا ئێستاش ژماره‌یێک گوندنشین و هاووڵاتیی هه‌رێم به‌هۆی ئه‌و بۆردومانانه‌وه‌ بوونه‌ته‌ قوربانی و زیانی زۆریش به‌ ژینگه‌ی ئه‌و ناوچانه‌ گه‌یشتووه‌.

له‌لایێکی دیکه‌شه‌وه‌ ژماره‌یێک بنکه‌ی سه‌ربازی و هه‌واڵگریی تورکیا له‌ هه‌رێمی کوردستاندایه‌ و هێزه‌کانی ئه‌و وڵاته‌ چوونه‌ته‌ قووڵاییی 30 کیلۆمه‌تریی خاکی هه‌رێم و ئۆپه‌راسیۆنێکی گه‌وره‌ی سه‌ربازی له‌و ناوچانه‌ ئه‌نجام ده‌ده‌ن.

سه‌رچاوه‌: ماڵپه‌ڕی ڕۆژنیووز

کۆدی هه‌واڵنێر: 60103