به‌پێی هه‌واڵی کوردپرێس، ئێواره‌ی ڕۆژی یه‌کشه‌ممه 14ی ته‌مووزی 2019 قه‌یس خه‌زعه‌لی ئه‌مینداری گشتیی بزووتنه‌وه‌ی عه‌سائیبی ئه‌هلی حه‌ق له‌سه‌ر به‌یاننامه‌ی ئه‌مدواییه‌ی مه‌سعوود بارزانی سه‌رۆکی پێشووی هه‌رێمی کوردستان و سه‌رۆکی پارتی هاته‌ده‌نگ و له هه‌ژماری تایبه‌تی خۆی له توویته‌ردا نووسیی: "که‌رکووک عێراقییه؛ نوقته سه‌ری دێڕ" که ئه‌مه‌ش وه‌ک وه‌ڵامدانه‌وه‌یێکه بۆ قسه‌کانی بارزانی له‌سه‌ر ناسنامه‌ی که‌رکووک که ڕای‌گه‌یاندبوو "كورد سازش له‌سه‌ر كوردستانی بوونی که‌رکووک ناكات."
كۆتاییی هه‌فته‌ی ڕابردوو پارتی و یه‌كێتی ئاشكرایان كرد كه له‌سه‌ر دانانی ته‌ییب جه‌بار بۆ پارێزگاری که‌رکووک ڕێككه‌وتون و دوابه‌دوای ئه‌وه‌ش به‌شێک له توركمان و عه‌ره‌به‌كان و گرووپه‌كانی سه‌ر به حه‌شدی شه‌عبی دژایه‌تیی خۆیان بۆ دانانه‌وه‌ی پارێزگارێكی كورد بۆ که‌رکووک ده‌ربڕی.
نووسینه‌که‌ی خه‌زعه‌لی له كاتێكدایه كه ڕۆژی شه‌ممه 13ی ته‌مموزی 2019 مه‌سعوود بارزانی سه‌رۆكی پارتی دیموكراتی كوردستان و سه‌رۆكی پێشووی هه‌رێم له ڕاگه‌یه‌ندراوێكدا ئاماژه‌ی به‌وه كرد که كێشه‌ی که‌رکووک ته‌نیا گرفتی سیاسیی نێوان دوو حزب یان ململانێی سیاسیی نێوان چه‌ند لایه‌ن نییه، له ڕاستیدا كێشه‌ی که‌رکووک بابه‌تێكی مێژوویی و سیاسی و كۆنه له هه‌مان كاتیشدا فره‌ڕه‌هه‌ند و گه‌وره‌یه.
بارزانی ڕای‌گه‌یاندبوو: "به‌هۆی ئه‌و بارودۆخه نائاساییه‌ی به سه‌ر كه‌ركووكدا هاتووه و له‌به‌ر پێویستی ئاسایی كردنه‌وه‌ی دۆخی ئه‌منی و ئیداریی شاره‌كه و خزمه‌تكردنی خه‌ڵكی که‌رکووک و هه‌روه‌ها چاره‌سه‌ركردنی كۆی كێشه‌كان، ئێمه له‌گه‌ڵ ئه‌وه‌داین ڕێككه‌وتن و هاوڕایی لایه‌نه كوردییه‌كان هه‌نگاوێكی گرنگه به‌ڵام له‌گه‌ڵ ئه‌وه‌شدا پێویسته كێشه‌كانی که‌رکووک به پارێزگاریشه‌وه سه‌ره‌تا له نێوان هه‌ولێر و به‌غدا یه‌كلایی بكرێته‌وه و چاره‌سه‌ر بكرێت و هه‌ر ئه‌نجامێكیشی هه‌بێت ده‌بێ جێگه‌ی ڕه‌زامه‌ندیی هه‌موو پێكهاته‌كانی که‌رکووک بێت."
سه‌رۆکی پارتی دیموکراتی کوردستان باسی له‌وه کردبوو که "له ئێستادا كه‌شێكی ئیجابی له په‌یوه‌ندییه‌كانی نێوان هه‌ولێر و به‌غدا هاتۆته ئاراوه و ئه‌وه‌یش ده‌رفه‌تێكی زۆر باشه كه به سوود وه‌رگرتن له‌و كه‌شه ئیجابییه گرفته ئه‌منی و ئیدارییه‌كانی كه‌ركووكیش چاره‌سه‌ر ببێت و له چوارچێوه‌ی ده‌ستووردا كه‌ركووک بگه‌ڕێته‌وه سه‌ر دۆخی ئاسایی خۆی چوونكه ئه‌و بارودۆخه‌ی ئێستا له که‌رکووک هه‌یه ناكرێ به‌رده‌وام بێت."
بارزانی ڕاشی‌گه‌یاندبوو: "ئێمه ئێستا و پێشتریش ڕامان وا بووه كه هیچ مساوه‌مه‌یێک له‌سه‌ر كوردستانی بوونی ناسنامه‌ی که‌رکووک ناكه‌ین و ده‌بێ كه‌ركووک ببێته نموونه‌ی پێكه‌وه‌ژیانی نه‌ته‌وه‌یی و ئایینی و هه‌موو پێكهاته‌كان بتوانن به ئاشتی و برایه‌تی و ته‌بایی له كه‌ركووكدا له‌گه‌ڵ یه‌كتر بژین."
سه‌رچاوه: ماڵپه‌ڕی ئه‌لغه‌د نیووز
کۆدی هه‌واڵنێر: 60103
Your Comment