کوردپرێس:
دكتۆر به‌رهه‌م ساڵح سه‌رۆک كۆماری عێراق له میانی چاوپێكه‌وتنێكیدا له‌گه‌ڵ عوسمان ئه‌لعومه‌یر دامه‌زرێنه‌ر و به‌ڕێوه‌به‌ری گشتیی ڕۆژنامه‌ی ئیلاف له‌باره‌ی دۆخی جیهان به گشتی و ناوچه‌كه به تایبه‌تی گفتوگۆیان ئه‌نجام دا و له‌و چاوپێكه‌وتنه‌دا ڕای‌گه‌یاند: "چیدی نامانه‌وێت عێراق ببێته مه‌یدانی جه‌نگ و ململانێكان چوونكه وڵاته‌كه ئه‌و ئه‌زموونه‌ی بینیوه و ده‌زانین كه چ جۆره ئه‌نجامێكی لێده‌كه‌وێته‌وه".
ناوبراو سه‌باره‌ت به ململانێكانی نێوان ویلایه‌ته یه‌كگرتووه‌كانی ئه‌مریكا و ئێران ئاماژه‌ی به‌وه كرد: "ئه‌و كێشه‌یه ده‌بێت له ڕێگه‌ی ئه‌نجامدانی دانووستانه‌وه چاره‌سه‌ر بكرێت، ئێران وڵاتێكی گرنگه له ناوچه‌كه‌دا و ناكرێت فه‌رامۆش بكرێت، سنووری عێراق له‌گه‌ڵ ئێران هه‌زار و 400 كیلۆمه‌تره، په‌یوه‌ندیگه‌لێكی توند ئێمه به گه‌لی ئێرانه‌وه ده‌به‌ستێته‌وه و نامانه‌وێت ئه‌و ناكۆكییه سه‌قامگیریی ناوچه‌كه بخاته مه‌ترسییه‌وه".
سه‌رۆكی عێراق له درێژه‌ی وته‌كانیدا سه‌باره‌ت به هه‌مان بابه‌ت به‌و ڕۆژنامه‌یه‌ی گوت: "ئێستا عێراق هاتووه‌ته‌وه ناو مه‌یدانی سیاسیی ناوچه‌كه و به‌رژه‌وندییه‌كانیشی له دوو خاڵدا خۆی ده‌بینێته‌وه؛ یه‌كه‌میان ئه‌وه‌یه كه نه‌گه‌ڕێته‌وه بۆ مێژووی جه‌نگ و په‌شێوی، دووهه‌میان به ئامانجگرتنی تێكده‌ری و تێرۆره كه ئه‌و كاره پێوستی به سیاسه‌تێكی دانایانه هه‌یه بۆ ده‌رهێنانی ڕه‌گ و ڕیشه‌یان".
کۆدی هه‌واڵنێر: 60103
Your Comment