بەپێی هەواڵی کوردپرێس، حوجەتولئیسلام حەمید شەهریاری لە کۆنگرەیەکی رۆژنامەوانیدا لەگەڵ میدیاکانی کوردستان ئاماژەی دا بە هۆکاری ئەوەی کوردستان وەک میوانداری یەکەمین کۆنفرانسی ناوچەیی یەکگرتوویی ئیسلامی هەڵبژێردرا و وتی: کوردستان هەمیشە هێمای یەکڕیزی شیعە و سوننە بووە لە ئێران و لەگەڵ ئەم کۆنفرانسە وەک هێمای یەکێتی ئیسلامیش لە ناوچەکەدا دەناسێنرێت.
ناوبراو ئاماژه‌ی به‌وه‌ش كرد: خۆبەخشی و گیانفیدایی خەڵكی كوردستان لە بەرگری كردن لە شۆڕشی ئیسلامی و نیشتمان ناوازەیە و نموونەی کوردستان لە كەم شوێن دەبینرێت.
سکرتێری گشتیی کۆمەڵەی جیھانیی لێکنزیک کردنەوەی ئایینەکان ڕایگەیاند: لە سەرەتای شۆڕشی ئیسلامییەوە تا ئێستا ٣٦ کۆنفرانسی یەکگرتوویی ئیسلامی بەڕێوەچووە و پەیامی ئەو کۆنفرانسانە یەکڕیزی و ھاوکاری بووە لە جیهانی ئیسلامدا.
حوجەتولئیسلام شەهریاری لە درێژەی قسەکانیدا وتی: هەڵبژاردنی کوردستان بۆ بەڕێوەبردنی یەکەمین کۆنفرانسی ناوچەیی یەکڕیزیی ئیسلامی بەهۆی پێگە و شوێنپێی ئەم پارێزگایەیە لە بواری یەکگرتووییدا، چوونکە کوردستان هەمیشە نموونە بووە لە پرسی یەکڕیزی ئیسلامی و پێکەوەژیانی نەتەوە و ئایینە جیاوازەکان.
ناوبراو وەبیریشی هێنایەوە: 28 وتاردەر لە کۆبوونەوەکەدا لە پارێزگاکانی هەولێر و سلێمانی و ناوچەکانی دیکەی هەرێمی کوردستان بەشدار دەبن و هەروەها لە سێ پارێزگای ئێرانیشەوە چەند وتارێک پێشکەش دەکرێت.
لە کۆتاییدا سکرتێری گشتیی کۆمەڵەی جیھانیی لێکنزیک کردنەوەی ئایینەکان ڕاشیگەیاند: دوورکەوتنەوە لە دووبەرەکی و سووکایەتی لە جیهانی ئیسلامیدا ستراتیجی بنەڕەتین لە گەیشتن بە ئوممەتێکی یەکگرتووی ئیسلامی.
Your Comment