گەلۆ عیسا ئەندامی ئەنجومەنی ناوەندیی پارتی دیموکراتی کورد لە سووریا (P.D.K.S) لە وەڵامی پرسیارێکی کوردپرێسدا کە ئایا تورکیا لە بڕیاری هێرش کردنە سەر کوردستانی سووریا پاشگەز بووەتەوە؛ ڕایگەیاند: تورکیا جیدی بوو لە هەڕەشەکانیدا و هەر کات دەرفەتی بۆ بڕەخسێت واز لە داگیرکاری ناهێنێت، بەڵام ئەمجارەیان نەیتوانی ڕەزامەندیی زلهێزەکان بۆ هێرش کردن بەدەست بێنێت.

ناوبراو درێژەی دا: تورکیا پاش داگیر کردنی گرێ سپی و سەرێکانی لە ساڵی 2019دا گرێبەستێکی ئاگربەستی لەگەڵ ئەمریکا و ڕووسیا واژۆ کرد و ئێستا ئەم وڵاتە هەر بەپێی ئەو گرێبەستە مۆڵەتی هێرشێکی دیکەی بەدەست نەهێناوە.

گەلۆ عیسا زیادی کرد: ئێمە بڕوامان وایە هەرکات کە دەرفەتەکە گونجاو بێت تورکیا پەلاماری کوردستانی سووریا دەداتەوە.

ئەم سیاسەتوانە کوردە وتیشی: لەم نێوانەشدا زلهێزەکان دەبێت ئاگربەست گەرەنتی بکەن و مۆڵەت بە تورکیا نەدەن شەڕێکی دیکە بنێتەوە چوونکە زەبرێکی زۆر لە ناوچەکە دەدات.

ئەندامی ئەنجومەنی ناوەندیی پارتی دیموکراتی کورد لە سووریا (P.D.K.S) وەبیری هێنایەوە: هێرشی تورکیا بۆسەر باکووری سووریا داعش چالاک دەکاتەوە و ئەو سەقامگیریە ئێستا هەیە لەناو دەچێت.

ناوبراو زیادیشی کرد: هێرشی تورکیا بۆسەر سووریا پێشێل کردنی یاسا نێودەوڵەتییەکانە و زلهێزەکان دەبێت ڕێگر بن لە ڕەفتارە هێرشبەرانەکانی تورکیا.