کوردپرێس:
ئێواره‌ی ڕۆژی شه‌ممه 15-6-2019 مه‌سرور بارزانی ڕاوێژکاری ئه‌نجومه‌نی ئاسایش و ڕاسپێردراو بۆ پێکهێنانی کابینه‌ی نوێی حکوومه‌تی هه‌رێمی کوردستان پێشوازیی له ماتیۆ توله‌ر باڵیۆزی نوێی ئه‌مریکا له عێراق و شاندی یاوه‌ری کرد.
له‌م دیداره‌دا که کونسووڵی گشتی ئه‌مریکا له هه‌ولێر ئاماده بوو په‌یوه‌ندییه‌کانی نێوان هه‌رێمی کوردستان و ئه‌مریکا و دواپه‌ره‌سه‌ندن و پێشهاته‌کانی ده‌ڤه‌ره‌که به شێوه‌یێکی گشتی تاوتوێ کران.
مه‌سروور بارزانی وێڕای پیرۆزبایی ده‌ست به‌کاربوون له باڵیۆزی نوێی ئه‌مریکا له عێراق هیوای سه‌رکه‌وتنی بۆ خواست و ڕای‌گه‌یاند: هه‌رێمی کوردستان وه‌ک هه‌میشه له‌سه‌ر بنه‌مای به‌رژه‌وه‌ندیی هاوبه‌ش و سه‌قامگیری و ئاشتی و پێکه‌وه‌ژیانی ئاشتییانه‌ی نێوان گه‌لان بۆ یه‌کلاکردنه‌وه‌ی کێشه‌کانی ده‌ڤه‌ره‌که بڕوای به ڕێگه‌چاره‌ی ئاشتییانه و گفتوگۆ هه‌یه.
هه‌ر له‌و دیداره‌دا تیشک خرایه سه‌ر پرۆسه‌ی پێکھێنانی کابینه‌ی نۆیه‌م و له‌وباره‌وه مه‌سروور بارزانی ئاماژه‌ی به‌وه کرد که هه‌نگاوه‌کان ده‌ستیان پێکردووه و له واده‌ی دیاریکراودا پێکھاته‌ی کابینه ده‌خرێته به‌رده‌م په‌رله‌مان.
له‌لای خۆیه‌وه باڵیۆزی نوێی ئه‌مریکا له عێراق پیرۆزبایی له مه‌سروور بارزانی کرد به‌بۆنه‌ی به فه‌رمی ڕاسپاردنی بۆ پێکهێنانی کابینه‌ی نوێی حکوومه‌تی هه‌رێمی کوردستان و هیوای سه‌رکه‌وتنی له ئه‌رک و به‌رنامه‌ی کابینه‌ی داهاتوو بۆ خواست، هه‌روه‌ها ئاماده‌ییی وڵاته‌که‌شی بۆ هاوکاری و په‌ره‌پێدانی په‌یوه‌ندییه‌کان له سه‌رجه‌م بواره‌کان نیشان دا.
کۆدی هه‌واڵنێر: 60103
Your Comment