کوردپرێس: ڕۆژی هه‌ینی (31ی ئایاری 2019) هاوپه‌یمانیی نێوده‌وڵه‌تی له به‌یاننامه‌یێکدا ئاماری چالاکییه‌کانی له سه‌ره‌تای شه‌ڕی دژی چه‌کدارانی داعش له مانگی ئابی 2014وه تاوه‌کوو مانگی نیسانی ئه‌مساڵ بڵاو کرده‌وه و به گوێره‌ی ئاماره‌که هاوپه‌یمانیی نێوده‌وڵه‌تی له‌و ماوه‌یه‌دا زیاتر له 34 هه‌زار هێرشی ئاسمانی کردووه‌ته سه‌ر پێگه‌کانی داعش له عێراق و سووریا.
هاوپه‌یمانی نێوده‌وڵه‌تی ئاماژه‌ی به‌وه‌ش کردووه: له‌و ماوه‌یه‌دا له‌سه‌ر بنه‌مای ئه‌و زانیارییانه‌ی هه‌یانبووه، هێزی ئه‌رکه هاوبه‌شه‌کان بۆردومانی ناوچه گومانلێکراوه‌کانی کردووه و له ئاکامدا 1302 هاووڵاتی مه‌ده‌نی به بێ مه‌به‌ست کوژراون.
هاوپه‌یمانیی نێوده‌وڵه‌تیی دژه‌داعش باسی له‌وه‌ش کرد که هاوپه‌یمانییه‌که تا ئێستاش 111 ڕاپۆرتی ده‌رباره‌ی ئه‌گه‌ری کوشتنی هاووڵاتیانی مه‌ده‌نی له‌به‌رده‌سته و له ئێستادا لێکۆڵینه‌وه‌یان تێدا ده‌کات.
هاوپه‌یمانیی نێوده‌وڵه‌تی که له زیاتر له 70 وڵات پێکدێت به ئامانجی هێرشی سه‌ربازی بۆ سه‌ر چه‌کدارانی داعش له عێراق و سووریا هاوینی ساڵی 2014 دامه‌زرا.
ئه‌م هه‌واڵه له میدیاکانی هه‌رێمی کوردستان وه‌رگیراوه
کۆدی هه‌واڵنێر: 60103
Your Comment