به‌پێی هه‌واڵی کوردپرێس، ئه‌مڕۆ چوارشه‌ممه 29ی ئایاری 2019 ناوه‌ندی سه‌رۆکایه‌تیی کۆماری عێراق له ڕاگه‌یێندراوێکدا بڵاوی کرده‌وه که ئێواره‌ی دوێنێ (سێشه‌ممه 28ی ئایاری 2019) به‌رهه‌م ساڵح سه‌رۆک کۆماری عێراق و ڕه‌جه‌ب ته‌ییب ئه‌ردۆغان سه‌رۆک کۆماری تورکیا له کۆشکی کۆماری تورکیا له ئه‌سته‌نبۆڵ کۆ بوونه‌وه و دۆخی سیاسیی ناوچه‌که و په‌یوه‌ندیی دووقۆڵی له نێوان عێراق و تورکیایان تاوتوێ کرد.
له ڕاگه‌یێندراوه‌که‌ی ناوه‌ندی سه‌رۆکایه‌تیی کۆماری عێراقدا هاتووه: له کۆبوونه‌وه‌که‌دا سه‌رۆک کۆمارانی عێراق و تورکیا باسیان له گۆڕانکاری و پێشھاته‌کانی ئه‌م دواییه‌ی ناوچه‌که کرد و له‌م چوارچێوه‌یه‌دا جه‌ختیان له گرنگی ھاریکاری و دیالۆگی جددی کرده‌وه له نێوان گشت لایه‌نه‌کان بۆ گه‌یشتن به ڕێگه‌چاره‌ی گونجاو و کۆتایی ھێنان به قه‌یرانه‌کان و دوورکه‌وتنه‌وه له زمانی ھه‌ڕه‌شه سه‌ره‌ڕای به‌رقه‌رارکردنی سه‌قامگیریی ئاسایش و خۆشگوزه‌رانی ئابووری.
هه‌روه‌ها له‌و کۆبوونه‌وه‌یه‌دا ھه‌ردوو سه‌رۆک باسیان له په‌یوه‌ندییه‌کانی نێوان ھه‌ر دوو وڵات و پێویستی به‌ھێزکردن و فراوانکردنی ئاستی ھاریکاریی ھاوبه‌ش کرد.
له ڕاگه‌یه‌ندراوه‌که‌دا باس له‌وه کراوه: له کۆبوونه‌وه‌که‌دا سه‌رۆک کۆماری عێراق جه‌ختی له پاراستنی سه‌روه‌ریی خاکی عێراق و ڕه‌تکردنه‌وه‌ی ھه‌ر کرده‌یێکی سه‌ربازیی تاکلایه‌نه کرده‌وه که پێشێلی سنووری عێراق بکات و ڕوونیشی کرده‌وه که ده‌سته‌به‌رکردنی ئاسایشی ھاوبه‌ش له ڕێگه‌ی هه‌ماهه‌نگیی نێوان ھه‌ر دوو لا و وڵاتانی ناوچه‌که‌وه دابین ده‌کرێت.
هه‌روه‌ها ھه‌ریه‌ک له محه‌مه‌د عه‌لی حه‌کیم و مه‌ولوود چاووشئۆغڵۆ وه‌زیری ده‌ره‌وه‌ی عێراق و تورکیا و فالح فه‌یاز ڕاوێژکاری ئاسایشی نیشتمانیی عێراق و ھاکان فیدان سه‌رۆکی ھه‌واڵگریی تورکیا ئاماده‌ی کۆبوونه‌وه‌که بوون.
شایانی باسه؛ ئێواره‌ی ڕۆژی سێشه‌ممه 28ی ئایاری 2019 به‌رهه‌م ساڵح سه‌رۆک کۆمار و د. سه‌رباخ خانمی یه‌که‌می عێراق به یاوه‌ریی شاندێکی باڵا به سه‌ردانێکی تایبه‌ت گه‌یشتنه تورکیا و له‌گه‌ڵ سه‌رۆک کۆماری ئه‌و وڵاته کۆ بوونه‌وه و هه‌ر به بۆنه‌ی ئه‌م سه‌ردانه ڕه‌جه‌ب ته‌ییب ئه‌ردۆغان سه‌رۆک کۆمار و ئه‌مینه ئه‌ردۆغان خانمی یه‌که‌می تورکیا خوانێکی به‌ربانگی تایبه‌تیان له‌سه‌ر شه‌ره‌فی به‌رھه‌م ساڵح و خانمی یه‌که‌م عێراق ئاماده کردبوو.
ئه‌وه یه‌که‌مین سه‌ردانی تایبه‌تی سه‌رۆک به‌رهه‌م ساڵح سه‌رۆکی کۆماری عێراق بوو بۆ تورکیا له دوای هه‌ڵبژاردنی به سه‌رۆک له مانگی ئۆکتۆبه‌ری ساڵی ڕابردووه‌وه.
سه‌رچاوه: هه‌واڵده‌ریی سۆمه‌ریه نیووز
کۆدی هه‌واڵنێر: 60103
Your Comment