به‌پێی هه‌واڵی کوردپرێس، عه‌بدولستار مه‌جید ئه‌ندامی مه‌کته‌بی سیاسیی کۆمه‌ڵ ڕای‌گه‌یاند که‌ حیزبه‌که‌ی ده‌نگ به‌ هه‌مواری یاسای سه‌رۆکایه‌تیی هه‌رێمی کوردستان نادات و ئه‌و یاسایه‌ له‌گه‌ڵ بنه‌مای دیموکراسی و سیسته‌می په‌رله‌مانی یه‌ک ناگرێته‌وه‌ هه‌ر بۆیه‌ به‌شداری له‌ کۆبوونه‌وه‌ی ئه‌مڕۆی په‌رله‌مان بۆ هه‌ڵبژاردنی سه‌رۆکی نوێی هه‌رێمی کوردستان ناکه‌ن.

ناوبراو ته‌ئکیدی کرده‌وه‌ که‌ سه‌رۆکی هه‌رێم وه‌ڵامده‌ری یاسای هه‌موارکراوی په‌رله‌مان نییه‌ و کۆمه‌ڵیش بابه‌تێکی وا قبووڵ ناکات.

عه‌بدولستار مه‌جید ڕاشی‌گه‌یاند: کۆمه‌ڵی ئیسلامی پاش ڕاسپاردنی سه‌رۆک وه‌زیرانی نوێی هه‌رێم بۆ پێکهێنانی کابینه‌ و گفتوگۆ له‌گه‌ڵ ناوبراو بڕیاری خۆی له‌سه‌ر به‌شداری‌کردن له‌ ده‌وڵه‌تی نوێ ده‌دات.

له‌لایێکی دیکه‌شه‌وه‌ یه‌کگرتووی ئیسلامیی کوردستان سه‌ره‌ڕای دژایه‌تی له‌گه‌ڵ هه‌مواری سه‌رۆکایه‌تیی هه‌رێم ڕای‌گه‌یاند: په‌رله‌مانتارانی ئه‌م حیزبه‌ ده‌نگ به‌ هیچ کاندیدێکی سه‌رۆکی هه‌رێم ناده‌ن.

کۆدی هه‌واڵنێر: 60103