کوردپرێس:
له کاتێکدا بڕیاره پاش ڕووپێوکردنی بیابانه‌کانی موسه‌ننا دوای جه‌ژنی ڕه‌مه‌زان تیمێکی پسپۆڕ کاری ھه‌ڵدانه‌وه‌ی گۆڕه به‌کۆمه‌ڵه‌کان ئه‌نجام بده‌ن ئه‌حمه‌د مه‌نفی، پارێزگاری موسه‌ننا له لێداونێكی تایبه‌تدا بۆ كوردستان 24 ده‌ڵێت: "ئێستا ئه‌وان چوونه‌ته سه‌ر گۆڕه به‌کۆمه‌ڵه‌کان که پێش دوو مانگ له سه‌ر داوای مه‌سعوود بارزانی دۆزیویانه‌ته‌وه و له‌م ڕۆژانه‌شدا گۆڕه‌کان ھه‌ڵه‌ده‌درێنه‌وه و ڕووفاته‌کان ڕه‌وانه‌ی پزیشکی دادی به‌غدا ده‌كرێن، پاشان ده‌نێردرێنه‌وه بۆ هه‌رێمی كوردستان."
هه‌ر له‌مباره‌یه‌وه زیا كه‌ریم به‌رپرسی گۆڕه به‌کۆمه‌ڵه‌کان له ده‌زگای شه‌ھیدانی عێراقیش كه له‌گه‌ڵ تیمێک لێكۆڵینه‌وه له‌و گۆڕه به‌كۆمه‌ڵانه ده‌كات و سه‌ردانی یه‌كێک له‌و گۆڕانه‌ی كردووه ده‌ڵێت: "به ھه‌ماھه‌نگی له‌گه‌ڵ وه‌زاره‌تی شه‌ھیدان و ئه‌نفالکراوانی هه‌رێمی كوردستان له‌گه‌ڵ تیمێکی پسپۆڕی نشتیمانی که له فه‌رمانگه‌ی گۆڕه به‌کۆمه‌ڵه‌کان و کارمه‌ندانی پزیشکی داد پێکھاتووه سه‌ردانی ئه‌و شوێنه‌مان كردووه و ئامانجیش له‌و سه‌ردانه بۆ زانینی شێوه‌ی گۆڕه‌کان و جۆری خۆڵ و نزیکترین شوێنه بۆی تاکوو ئاماده‌کارییه لۆجستیه‌کانی بکه‌ین بو ھه‌ڵدانه‌وه‌ی ئه‌و گۆڕانه".
له‌م چوارچێوه‌یه‌شدا به‌ره‌ڤان حه‌مدی بریکاری وه‌زاره‌تی شه‌ھیدان و ئه‌نفالکراوان ده‌ڵێت: له نه‌خشه‌ی تایبه‌تی گۆڕه به‌کۆمه‌ڵه‌کانی عێراقدا ئه‌نفالکراوان ده‌که‌ونه سێگۆشه‌ی بیابانی پارێزگاکانی ئه‌نبار، نه‌جه‌ف، دیوانیه و سه‌ماوه ھه‌ر بۆیه ئه‌رکی حکوومه‌تی ھه‌رێمه له سه‌ر ئه‌و بنه‌مایه به شوێن ڕووفاتی ئه‌نفالکراوان بگه‌ڕێت.
وه‌زاره‌تی شه‌هیدان و ئه‌نفالكراوانی حکوومه‌تی هه‌رێمی كوردستان به ھه‌مه‌ھه‌نگی له‌گه‌ڵ ده‌زگای شه‌ھیدانی عێراقی و چه‌ند ڕێکخراوێکی نێوده‌وڵه‌تی لیژنه‌یێکی نشتیمانیان پێكهێناوه و ئه‌رکی ھه‌ڵدانه‌وه‌ی سێ گۆڕی به‌کۆمه‌ڵ له سنووری پارێزگای موسه‌ننایان له ئه‌ستۆ گرتووه که نزیکه‌ی 300 ڕووفاتی له خۆ گرتووه و بریاریشه له 15ی حوزه‌یرانی ئه‌مساڵ ده‌ست به کاره‌کانیان بکه‌ن.
کۆدی هه‌واڵنێر: 60103
Your Comment