کوردپرێس:
پارێزه‌ر گۆران دیبه‌گه‌یی نوێنه‌ری لقی هه‌ولێری سه‌ندیکای پارێزه‌رانی کوردستان له كۆنگره‌یێكی ڕۆژنامه‌وانیدا ڕای‌گه‌یاند: "هه‌ڕه‌شه‌كانی تیرۆریستانی داعش له‌سه‌ر جووتیارانی سنووری قه‌زای مه‌خموور هه‌ڕه‌شه‌ی جددین و جێگه‌ی مه‌ترسین به‌تایبه‌ت له ئێستادا كه وه‌رزی دروێنه‌وه‌ی گه‌نم و جۆ ده‌ست پێده‌كات."
ناوبراو ئاماژه‌ی به‌وه‌ش کرد: "وه‌ک پارێزه‌رانی خۆبه‌خشی جووتیارانی ئه‌و سنووره له‌گه‌ڵ لیژنه‌ی كشتوكاڵ و لیژنه‌ی مادده‌ی 140 كۆ بووینه‌وه و یادداشتێكمان ئاڕاسته‌ی په‌رله‌مانی كوردستان كردووه."
له یادداشته‌که‌دا ڕامانگه‌یاندووه که "به‌هۆی کشانه‌وه‌ی پێشمه‌رگه بۆشاییی ئه‌منی له سنووره‌که دروست بوووه و ئێستاش که وه‌رزی دروێنه نزیک بووه‌ته‌وه مه‌ترسی و هه‌ڕشه‌ی داعش بۆ سه‌ر جووتیاران به‌رده‌وامه به‌تایبه‌ت ئه‌و گوندانه‌ی که‌وتوونه‌ته هه‌ر دوو دیوی چیای قه‌ره‌چوغ چوونکه داوای باج و سه‌رانه له جووتیاران ده‌كه‌ن."
گۆران دیبه‌گه‌یی وتیشی: "داوامان كردووه هه‌رچی زووه كار بكرێت و هێزی زیاتر ڕه‌وانه‌ی ئه‌و سنووره بكرێت، هه‌روه‌ها تیمی ئاگركوژێنه‌وه و به‌رگری شارستانی زیاتر ڕه‌وانه‌ی سنووری قه‌زای مه‌خموور بكرێت بۆ پاراستنی به‌رهه‌مه كشتوكاڵییه‌كانی جووتیاران".
کۆدی هه‌واڵنێر: 60103
Your Comment