به‌پێی هه‌واڵی کوردپرێس، ئه‌مڕۆ یه‌کشه‌ممه 28ی نیسانی 2019 محه‌مه‌د عه‌لی حه‌کیم وه‌زیری ده‌ره‌وه‌ى عێراق له دوای کۆبوونه‌وه‌ى له‌گه‌ڵ مه‌ولوود چاووشئۆغڵۆ وه‌زیری ده‌ره‌وه‌ی تورکیا له به‌غدا له کۆنگره‌یێکى ڕۆژنامه‌نووسیدا گوتی: له کۆبوونه‌وه‌که‌دا گرنگترین ڕۆژه‌ڤه سیاسییه‌کان له‌وان هاوپه‌یوه‌ند به ئێران و وڵاتانی دیکه‌مان خسته به‌ر باس و لێکدانه‌وه و تاوتوێی په‌یوه‌ندییه بازرگانییه‌کانی نێوان تورکیا و عێراق کرد و هه‌وڵ ده‌درێت ئاسانکاری بۆ کۆمپانیا تورکییه‌کان بکرێت بۆ ئه‌وه‌ی بتوانن کاڵاکان له خاکی عێراقه‌وه به‌ره‌و وڵاتانی‌تری که‌نداو بنێرن.
ناوبراو ڕاشیگه‌یاند: پرسی ئاو یه‌کێکه له پرسه هه‌ستیاره‌کان و له‌گه‌ڵ وه‌زیری ده‌ره‌وه‌ى تورکیا گفتوگۆمان له‌باره‌وه کردووه.
حه‌کیم گوتیشی: "نابێت خاکی ئێمه دژ به تورکیا به‌کار بهێندرێت و ده‌بێت سنوره‌کانمان ئارام بێت و به هه‌موو شێوه‌یێک هێرش کردنی سه‌ر تورکیا له عێراقه‌وه ڕه‌ت ده‌که‌ینه‌وه".
هاوکات مه‌ولوود چاووشئۆغڵۆ وه‌زیری ده‌ره‌وه‌ى تورکیا له کۆنفڕانسه‌که‌دا ڕایگه‌یاند که دوای سه‌ردانی به‌سره سه‌ردانی هه‌رێمی کوردستان ده‌کات.
مه‌ولوود چاوشئۆغڵو وتیشی: کۆتاییی ئه‌مساڵ ئه‌ردۆغان سه‌رۆک کۆماری تورکیا سه‌ردانی عێراق ده‌کات و چه‌ندین پرس تاوتوێ ده‌کات.
هه‌روه‌ها باسی له‌وه‌ش کرد که مۆڵه‌تیان وه‌رگرتووه به کردنه‌وه‌ی دوو کونسووڵخانه له شاره‌کانی که‌رکووک و نه‌جه‌ف.
وه‌زیری ده‌ره‌وه‌ی تورکیا ئه‌وه‌شی وت: له ئێستادا عێراق وه‌ک ساڵی پاڕ وشکه‌ساڵی نییه به‌ڵکوو ئاو زۆره و کێشه‌ى لافاوی هه‌یه و ئه‌مه‌ش ئه‌وه ده‌سه‌لمێنێت که پێویسته عێراق و تورکیا هاوکاری و هه‌ماهه‌نگیی ته‌واویان بۆ کۆنترۆڵکردنی ئاو له نێوانیاندا هه‌بێت.
شایانی باسه؛ ئه‌مڕۆ یه‌کشه‌ممه 28ی نیسانی 2018 مه‌ولوود چاووشئۆغڵۆ وه‌زیری ده‌ره‌وه‌ی تورکیا بۆ تاوتوێی چه‌ند پرسێکی جیاواز گه‌یشتوووه‌ته شاری به‌غدا و وابڕیاره چه‌ند ڕۆژێک بمێنێته‌وه.
سه‌رچاوه: سۆمه‌ریه نیووز
کۆدی هه‌واڵنێر: 60103
Your Comment