بەپێی هەواڵی کوردپرێس، سەرۆک کۆماری ئیسلامیی ئێران حەسەن ڕۆحانی لە سێزدەهەمین ساڵۆگەڕی نەتەوەیی پیشەی ناڤۆکیدا کە لە هۆڵی کۆبوونەوەکانی سەرانی وڵاتانی ئیسلامی بەڕێوەچوو ڕایگەیاند: ئیستیکباری جیهانی و ئەمریکا ئەمڕۆکە ڕق و دوژمنایەتی و شکستەکانی خۆی لە ڕێگای بە تیرۆریست ناساندنی گرووپێکەوە قەرەبوو دەکاتەوە کە بەردەوام گەورەترین دوژمنی تیرۆریزم بووە.

ناوبراو زیادی کرد پاسدارەکان لە ڕۆژی ئەوەڵی شۆڕشەوە پاڵپشتی خەڵک بوون و ئارامیی خۆیان لە بەرژەوەندیی شۆڕشی ئیسلامی قوربانی کرد.

سەرۆک کۆماری ئیسلامیی ئێران ئاماژەی دا بە پیلانگێڕییەکانی دوژمنانی ئێرانی ئیسلامی لە سەرەتای شۆڕشەوە و وەبیری هێنایەوە: ئەوان گرووپە تیرۆریستییەکانیان پڕچەک کرد تا بەرپرسان و خەڵکی ئێران بکەنە ئامانج و بگەڕێنەوە بۆ سەردەمی دەسەڵاتدارێتیی خۆیان.

ڕۆحانی زیادی کرد لەو سەردەمەدا ئێمە پێویستمان بە هێزێک بوو کە هەمبەر دوژمن بوەستێتەوە، لەو ڕۆژانەدا کە گرووپە تیرۆریستییەکان دەستگیر دەکران و لە ناودەبرا سوپای لە سەرووی هەمووان بوو.

کۆدی هەواڵنێر: 60113