بەپێی هەواڵی کوردپرێس، شۆڕش ئیسماعیل وه‌زیری پێشمه‌رگه‌ی حكوومه‌تی هه‌رێم، پێشوازیی كرد له جه‌نه‌ڕاڵ فلیپس، گه‌وره راوێژكاری باڵای هێزه‌كانی ئه‌مریكا و كۆلۆنێل دۆگڵاس به‌رپرسی تیمی هاریكاری ئاسایشی ئه‌مریكا له هه‌رێم، و تیمێكی یاوه‌ری و له كۆبونه‌وه‌یه‌كیشدا، گفتوگۆی چڕ و به‌رهه‌مدار كرا له‌سه‌ر پرسی چاكسازی وه‌زاره‌تی پێشمه‌رگه و مه‌ترسییه‌كانی ئێستای تیرۆریستان و ناوچه‌كه.
له كۆبوونه‌وه‌كه‌دا گفتوگۆكرا سه‌باره‌ت به پرسی پاراستنی سنوره‌كان له‌دوای هه‌ڵاتنی تیرۆریستانی داعش له زیندانی حه‌سه‌كه، بۆ ئه‌مه‌ش گه‌وره راوێژكاری سه‌ربازی ئه‌مریكا، ستایشی هێزه‌كانی پێشمه‌رگه‌ی كرد له‌سه‌ر پاراستنی ته‌واوه‌تی ناوچه سنورییه‌كان و پاڵپشتی و پشتیوانی وڵاته‌كه‌شی بۆ هێزی پێشمه‌رگه‌ی كوردستان دوپاتكرده‌وه.
له‌سه‌ر پرسی رێفۆرمی سه‌ربازی، پێكهێنانی دوو لیوای هاوبه‌شی نێوان پێشمه‌رگه و سوپای عێراق، وه‌زیری پێشمه‌رگه روونیكرده‌وه كه "له‌پرۆسه‌ی چاكسازی هه‌نگاوی باش چوینه‌ته پێشه‌وه و بۆ به‌رده‌وامبوونیشی پێویستیمان به‌هاوكاری و هه‌ماهه‌نگی زیاتر و فراوانتر هه‌یه".
هاوكات له‌باره‌ی پێكهێنانی دو لیوای هاوبه‌شیش، وه‌زیری پێشمه‌رگه رایگه‌یاند كه "له‌لای وه‌زاره‌تی پێشمه‌رگه سه‌رجه‌م رێككاره پێویستیه‌كانی ته‌واوكراوه و ماوه‌ته‌وه سه‌ر وه‌زاره‌تی به‌رگری عێراق كه كاره‌كانی ته‌واو بكات".
بۆ ئه‌مه‌ش داوای له ئه‌فسه‌رانی باڵای ئه‌مریكا و هاوپه‌یمانان كرد، فشار بخه‌نه سه‌ر عێراق بۆ ته‌واوكردنی كاره‌كان و تا ئه‌و لیوایانه بكه‌ونه رۆڵبینین و به‌رپرسیارێتی له‌ناوچانه‌ی بۆشایی ئه‌منیان هه‌یه له‌نێوان هه‌ردوولادا.
Your Comment