به‌پێی هه‌واڵی کوردپرێس، یه‌کێتیی نیشتیمانیی کوردستان به مه‌رجی شه‌راکه‌تی ڕاسته‌قینه و ھاوسه‌نگی له بڕیاردان به‌شداری له حکوومه‌تی داھاتووی ھه‌رێمی کوردستان ده‌کات و مکووڕه له‌سه‌ر داواکارییه‌کانی سه‌باره‌ت به پێکهێنانی حکوومه‌تی داهاتووی هه‌رێمی کوردستان و بۆ وده‌ستهێنانی داواکارییه‌کانی داوای ڕێککه‌وتنێکی نوێ له پارتی ده‌کات.
حاکم قادر حه‌مه‌جان ئه‌ندامی مه‌کته‌بی سیاسیی یه‌کێتیی نیشتیمانیی کوردستان به کوردستان 24ی گوت: یه‌کێتی داوای به‌شداریی ڕاسته‌قینه له حکوومه‌تی هه‌رێمی کوردستان ده‌کات هه‌ر بۆیه ده‌بێ هاوبه‌ش بین له سه‌رۆکایه‌تیی هه‌رێمی کوردستان و حکوومه‌ت و په‌رله‌مان و دارایی و ناوخۆ.
ناوبراو جه‌ختی کرده‌وه: یه‌کێتی داوای گه‌ڕانه‌وه بۆ دابه‌ش‌کردنی پۆست به‌پێی سیسته‌می 50-50 له‌گه‌ڵ پارتی ناکات به‌ڵام مکووڕه له‌سه‌ر وه‌ده‌ستهێنانی ئیستیحقاقی خۆی له ده‌وڵه‌ت و په‌رله‌مان و ڕێککه‌وتنه‌کانی ڕابردووش نه‌یتوانیوه ئاڵنگارییه‌کانی به‌رده‌م پێکهێنانی حکوومه‌ت و ده‌ست پێکردنی کاری په‌رله‌مان چاره‌سه‌ر بکات هه‌ر بۆیه داوای ڕێککه‌وتنێکی نوێ له‌گه‌ڵ پارتی ده‌کات.
ئه‌مه له حاڵێکدایه که پێشتر به‌رپرسانی پارتی ڕایان‌گه‌یاندبوو: "ئێمه حزبێکی گه‌وره‌ین و له سه‌ره‌تاوه وتوومانه به‌شداری له حکوومه‌ت ده‌که‌ین و یه‌کێتی له چه‌ند ساڵی ڕابردوودا شه‌ریکی ڕاسته‌قینه‌ی ده‌سه‌ڵات بوووه."
به‌رپرسانی پارتی ڕاشیان‌گه‌یاندوووه: "کاتی کراوه‌مان بۆ پێکهێنانی حکوومه‌ت له به‌رده‌م نییه و ده‌شمانه‌وێت له‌گه‌ڵ یه‌کێتی بگه‌ینه ڕێککه‌وتن."
پارتی دیموکراتی کوردستان و یه‌کێتیی نیشتمانیی کوردستان له ماوه‌ی ڕابردوودا چه‌ندین كۆبوونه‌وه‌یان ئه‌نجام داوه و ڕێكکه‌وتنێک له نێوان ھه‌ردوولا واژۆ كراوه به‌ڵام ئه‌و رێكکه‌وتنه تا ئێستا کۆی له‌مپه‌ره‌کانی پێکھێنانی حکوومه‌تی لانه‌بردوووه و ھێشتا خاڵی ناکۆک له نێوان ھه‌ردوولادا ھه‌ن.
کۆدی هه‌واڵنێر: 60103
Your Comment