بەپێی هەواڵی کوردپرێس، ڕابوون مەعروف سەرۆکى فراکسیۆنى نەوەى نوێ لە پەرلەمانى عێراق ڕایگەیاند، ١٠ ساڵى دیکەش بێت سەرۆکایەتیی حکوومەتى هەرێم لەسەر پاشەکەوتى مووچەى فەرمانبەران دەبێت دادگایی بکرێت.

ڕابوون مەعروف بە ئێن ئاڕ تی-ی ڕایگەیاند نابێت ئەم كابینەی حكوومەت و كابینەی داهاتووش لابردنی پاشەکەوتى مووچەى فەرمانبەران بكاتە منەت بەسەر خەڵكەوە، چوونکە پارەکە لە بەغداوە دێت.

ناوبراو وتیشی، حكوومەتی هەرێم دەبێت مووچە پاشەكەوتكراوەكانیش بگەڕێنێتەوە، چوونكە داهاتی ئەوەندە هەیە بەبێ ئەوەى حکوومەتى ناوەندى پارەى بۆ بنێرێت، مافى فەرمانبەرانى بداتەوە، بە تایبەتى دواى ڕێککەوتنە ٢٠ ساڵییەکەى حکوومەتى هەرێم لەگەڵ کۆمپانیای پێرڵ پێترۆلیۆم لەسەر بەرهەمهێنانى غاز.

ئەوە لەکاتێکدایە، ئێوارەى دوێنێ نێچیرڤان بارزانى سەرۆکى حکوومەتى هەرێم کۆتایی هاتنى سیستمى پاشەکەوتى مووچەى ڕاگەیاند، کە هەر لەو کابینەیەدابوو سیستمى پاشەکەوتى مووچە دەستیپێکرد.

کۆدی هەواڵنێر: 60113