به‌پێی هه‌واڵی کوردپرێس، ئه‌مڕۆ پێنجشه‌ممه 21ی شوباتی 2019 قوتری عوبه‌یدى سه‌ركرده له هێزه‌كانى حه‌شدى عه‌شایرى له پارێزگاى ئه‌نبار به سۆمه‌ریه نیووزی ڕاگه‌یاندوووه: سه‌ركردایه‌تیی پرۆسه‌كانى جزیره و فیرقه‌ى حه‌وتى سوپاى عێراقى 151 چه‌كدارى ڕێكخراوى داعشیان له هێزه‌كانى سووریاى دیموكرات وه‌رگرتوووه که پێشتر خۆیانیان ڕاده‌ستی هێزه‌کانی کورد- عه‌ره‌ب ناسراو به سوپای سووریای دیموکرات کردبوو.
ناوبراو ڕوونیشی کرده‌وه: زۆرینه‌ى ئه‌و چه‌كدارانه به ماده‌ى 4ى تیرۆر له‌لایه‌ن دادگاكانى عێراقه‌وه داواكراو بوون و له ساڵی 2014ی زایینییه‌وه له‌گه‌ڵ سوپا و خه‌ڵکی ئه‌و وڵاته شه‌ڕیان ده‌کرد.
ئه‌وه‌ش له حاڵێکدایه که پێشتر ڕۆژنامه‌یێکی عه‌ره‌بی باسی له په‌یوه‌ندیی نێوان فه‌رمانده سه‌ربازییه‌کانی عێراق و سوپای سووریای دیموکرات کردبوو له‌سه‌ر چه‌کدارانی تیرۆریستیی داعش و له‌وباره‌وه به‌غدا داوای گه‌ڕانه‌وه‌ی تیرۆریستییه داعشییه عێراقییه‌کان ده‌کات بۆ ئه‌وه‌ی به‌پێی یاسای خۆی دادگه‌ییان بکات.
کۆدی هه‌واڵنێر: 60103
Your Comment