به‌پێی هه‌واڵی کوردپرێس، نووسینگه‌ى عادل عه‌بدولمه‌هدى سه‌رۆكى هێزه چه‌كداره‌كانى عێراق فه‌رمانێكى بۆ پێكهێنانى شانه‌ى ڕاگه‌یاندنى ئه‌منى ده‌ركردوووه و له به‌یاننامه‌یێكدا ڕوون كراوه‌ته‌وه که به‌پێى فه‌رمانه‌كه "عه‌مید محه‌مه‌د ئیبراهیم به‌یزانى" له وه‌زاره‌تى ناوخۆ سه‌رپه‌رشتیارى تیمه‌كه‌یه و هه‌ریه‌كه له وه‌زاره‌تى به‌رگرى و سه‌ركردایه‌تیى هێزه وشكانیه‌كان و ده‌زگاى دژى تیرۆر و ده‌زگاى هه‌واڵگرى و ئاسایشى نیشتمانى و ده‌سته‌ى حه‌شدى شه‌عبى و پۆلیسى فیدراڵى ئه‌ندامى شانه‌كه‌ن.
هه‌روه‌ها ڕوونیش کراوه‌ته‌وه که عه‌قید عوسمان محه‌مه‌د مسته‌فا نوێنه‌رى وه‌زاره‌تى پێشمه‌رگه‌ى سه‌ر به حكوومه‌تى هه‌رێمى كوردستان ده‌بێت له شانه‌كه و عه‌مید یه‌حیا ڕه‌سووڵ وته‌بێژى فه‌رمى ده‌بێت.
به‌پێى به‌یاننامه‌كه، كارى شانه‌كه داڕشتنه‌وه‌ى هه‌واڵ و به‌یاننامه‌كان و دیارى كردنى كاریگه‌رییه ده‌روونییه‌كان ده‌بێت بۆ هه‌ر بابه‌تێک كه ده‌نووسرێت و ده‌رده‌كرێت، هه‌روه‌ها یه‌كێک له مامۆستایانى عه‌ره‌ب زمان له وه‌زاره‌تى خوێندنى باڵا و لێكۆڵینه‌وه‌ی زانستى ڕاده‌سپێردرێت بۆ داڕشتنه‌وه‌ى زمانه‌وانى و پێداچوونه‌وه‌ى پێش ئه‌وه‌ى بڵاو بكرێته‌وه.
کۆدی هه‌واڵنێر: 60103
Your Comment