به‌پێی هه‌واڵی کوردپرێس، ئه‌مڕۆ شه‌ممه 15ی کانوونی یه‌که‌می 2018 مه‌سروور بارزانی ڕاوێژکاری ئه‌نجومه‌نی ئاسایشی هه‌رێمی کوردستان پێشوازی کرد له محه‌مه‌د حه‌لبووسی سه‌رۆکی ئه‌نجومه‌نی نوێنه‌رانی عێراقی فیدراڵ و شاندی یاوه‌ری.
له دیدارێکدا دواپه‌ره‌سه‌ندن و ئاسته‌نگه‌کانی به‌رده‌م پرۆسه‌ی سیاسیی عێراق و په‌یوه‌ندیی نێوان به‌غدا و هه‌ولێر تاوتوێ کران.
له سه‌ره‌تای دیداره‌که‌دا سه‌رۆکی ئه‌نجومه‌نی نوێنه‌رانی عێراق هیوای سه‌رکه‌وتنی بۆ مه‌سروور بارزانی له سه‌رۆکایه‌تیی کابینه‌ی داهاتووی حکوومه‌تی هه‌رێمی کوردستان خواست و ئاماده‌ییی خۆی بۆ هه‌ماهه‌نگی و هاوکاریی زیاتر ده‌ربڕی.
هه‌ر له‌و دیداره‌دا ئه‌رکی ئه‌م خوله‌ی ئه‌نجمه‌نی نوێنه‌ران له به‌دواداچوونی پرسه‌کان به گشتی به‌تایبه‌تی پرسی بودجه و دابین کردنی به‌شه بودجه‌ی هه‌رێم به شێوه‌یێکی دادپه‌روه‌رانه و ماده‌ی 140 گفتوگۆی له‌باره‌وه کرا.
لای خۆیه‌وه مه‌سروور بارزانی جه‌ختی له‌سه‌ر خواستی هه‌رێمی کورستان بۆ چاره‌سه‌ری گشت کێشه‌کان له چوارچێوه‌ی ده‌ستووری عێراق کرده‌وه و ئاماژه‌ی به‌وه کرد که پێویسته به‌ربه‌ستی کێشه له‌مێژینه‌کان تێپه‌ڕێنین و به جۆرێک چاره‌سه‌ر بکرێن که ئیتر ڕێگه له دووباره‌بوونه‌وه‌یان بگیرێت و ته‌نیا به‌و شێوه‌یه ده‌توانین به‌ره‌و داهاتوویێکی گه‌ش و پێشکه‌وتنی وڵات هه‌نگاو بنێین.
هه‌ماهه‌نگیی نێوان هێزه سیاسییه‌کان بۆ تێپه‌ڕاندن و زاڵبوون به سه‌ر هه‌ڕه‌شه ئه‌منی و سیاسی و ئابوورییه‌کان ته‌وه‌رێکی دیکه‌ی دیداره‌که بوو.
سه‌رچاوه: ماڵپه‌ڕی فه‌رمیی پارتی دیموکراتی کوردستان
کۆدی هه‌واڵنێر: 60103
Your Comment