کوردپرێس:

لە راگەیێندراوێکدا کۆمیسیۆنی ئەورووپا ئاشکرای کرد، بڕی 56 ملیۆن و 500 هەزار یۆرۆ دەبەخشێتە عێراق، ئەوەش بڕی یارمەتییەکانی یەکێتییەکە بۆ ساڵی 2018 دەگەیەنێتە 129 ملیۆن یۆرۆ.

ئەو پارەیە بەشێکە لەو 400 ملیۆن یۆرۆیەی کە یەکێتیی ئەورووپا لە چوارچێوەی کۆنفرانسی ئاوەدانکردنەوەی عێراق لە کوێت بەڵێنی دابوو بیداتە عێراق.

ئامانج لە دابین­کردنی ئەو بڕە داهاتە خێراکردنی ئاوەدان­کردنەوەی ناوچەکانی مووسڵ، بەسرە و دەوروبەری پارێزگای نەینەوایە. داهاتەکە یارمەتیدەر دەبێت بۆ گەڕاندنەوەی ئاوارەکان، هەروەها دابینکردنی خزمەتگوزاری پێویست و هاندانی گەنجان بۆ وەبەرهێنان و پێشخستنی کەرتی پەروەردە و تەندروستی.

نێڤین میمیکا، کۆمیسیاری گەشەپێدان و هاوئاهەنگی نێودەوڵەتی رایگەیاندووە، یەکێتیی ئەورووپا بەڵێنەکەی مانگی شوباتی ئەمساڵ لە کۆنفرانسی ئاوەدان­کردنەوەی عێراق لە کوێت جێبەجێ دەکات. ئەو هاوکارییە نوێیەش دەرفەت و هەلی کار دابین دەکات، هەروەها هاوکاریی چەندین گرووپ و پێکهاتە دەکات کە بگەڕێنەوە زێدی خۆیان و دووبارە دەست بە بونیاتنانەوە ژیانی خۆیان بکەن.