بەرپرسێکی سیاسی ئیدارەی خۆسەری کوردستانی سووریا کە نەویست ناوی بدرکێندرێت و لە کوردستانی عێراق جێگیرە لەبارەی وتەکانی بەرپرسێکی ئەنەکەسە کە وتبووری پەیەدە و پەکەکە هۆکاری دەستدرێژیی تورکیان بۆسەر کوردستانی سووریا، وتی: لە کوردستانی سووریا بیست و پێنج حزبی سیاسی پێکەوە بەڕێوەبەریی ئیدارەی خۆسەریان بەدەستەوە گرتووە و توانییانە مودێلێکی سیاسی پێک بێنن و لە بەرامبەر تیرۆریستەکان بەرگریی لە خەڵکەکەیان بکەن.
ناوبراو زیادی کرد: ساڵی 2012 بەرەی نوسرە بەهەموو هێزەکانییەوە هێرشی کردە سەر سەرێکانی و دەیویست کوردستانی سووریا داگیر بکا. بەرەی نوسرە لە کوێوە هاتە ناو سەرێکانی؟ مەگەر لە تورکیاوە و بە کەرەستەی تورکیا نەهاتە ناو خاکی سووریا و ئەمڕۆش ئەنجومەنی نیشتمانی هاوپەیمانی تورکیایە.
ئەم بەرپرسە سیاسییە جەختی کردەوە: مەگەر بەشێک لەم کەسانە ئێستا لە توککیا نین و بەشێک لە ئەخوانولموسلمین و بەرەی نوسرە نین؟ بۆچی ناگەڕێنەوە کوردستانی سووریا و بەرگری لە خەڵکەکەیان ناکەن و بوونەتە هاوپەیمانی داگیرکەران.
ناوبراو وتیشی ئەمانە ڕەخنە لە پەکەکە دەگرن کە بۆچی لە کوردستانی سووریا شەڕی کردووە. ڕاستە کە ژمارەیێک لە هێزەکانی پەکەکە بۆ شەڕی داعش و بەرەی نوسرە هاتنە کوردستانی سووریا، بەڵام کوردانی سووریا خۆیان خاوەنی لقی سەربازیی سەربەخۆن و یەکینەکانی پاراستنی گەل و یەکینەکانی پاراستنی ژنانیان پێک هێناوە.
ئەم سیاسەتوانە کوردەی سووریا وتیشی: ئەمە پروپاگندای تورکیایە و بەشێک لە حزبەکانی ناو ئەنەکەسە بوونەتە دارەدەستی تورکیا. ژمارەیێک لە وڵاتپەراستانی ئەنەکەسە هەر گیز ئەم باسانە ناکەن بەڵام هەندێکیان بوونەتە ئامێری دەستی تورکیا.
Your Comment