کۆفان کەنعۆ سەرۆکی پارتی ڕ‌ۆژی دیموکراتی کورد لە سووریا لە وەڵامی پرسیارێکی کوردپرێسدا کە ئایا مەترسیی هێرشی دووبارەی تورکیا بۆسەر باکووری سووریا پاش کەم بوونەوەی هەڕەشەکانی ئەردۆغان لە ئارادایە؛ ڕایگەیاند: یەکێک لەو هۆکارانەی بووە هۆی کەمتر بوونەوەی هەڕەشەکانی تورکیا لە دژی کوردستانی سووریا ئەمریکا و ڕووسیان کە ئەو مۆڵەتەیان بە ئەردۆغان نەدا بۆ هێرشی دووبارە.
ناوبراو درێژەی دا: تورکیا لە ئێستادا دەست بۆ هێرشێکی دیکە نابات بەڵام ناوچەی عەین عیسا بەشێوەیەکی چڕ بوردوومان دەکرێت و بووەتە هۆی ئاوارەبوونی گوندنشینەکانی ئەم ناوچانە.
کۆفان کەنعۆ وتیشی: پارتی دەسەڵاتداری داد و گەشەپێدان لە دۆخێکی زۆر خراپدایە و ڕۆژ لە دوای ڕۆژ ئاستی جەماوەریی لەنێو خەڵکی تورکیادا دادەبەزێت و خۆپیشاندانەکانی ئەم دواییە پێگەی لاوازی ئەم حزبەی لەنێو خەڵکی سووریا دەرخست.
سەرۆکی پارتی ڕ‌ۆژی دیموکراتی کورد لە سووریا لەبارەی دانوستانەکانی ئیدارەی خۆسەر و حکوومەتی ناوەندی سووریا زیاتر وتی: ڕووسەکان هەوڵیان بۆ دەست پێکردنی گفتوگۆ لەنێوان ئیدارەی خۆسەر و حکوومەتی ناوەندیدا داوە، بەڵام دیمەشق هیچ سیگناڵێک بۆ نەرمی نواندن و چارەسەر کردنی کێشەکان نانێرێت؛ پێویستە ڕووسیا گوشار لەسەر حکوومەتی سووریا دروست بکات تا دانوستانی نوێ دەست پێبکات.
ناوبراو وەبیری هێنایەوە: ئیدارەی خۆسەر بەشێوەیەکی جیدی بەدوای گفتوگۆ و چارەسەر کردنی کێشەی کورەکاندایە لەچوارچێوەی چەسپاندنی مافی کورد لە دەستووری نوێی سووریا. بەڵام حکوومەتی ناوەندی ئاوڕ لەم بابەتە ناداتەوە و تێڕوانینی هاوشێوەی پێش 2011یە.
کۆفان کەنعۆ لە کۆتاییدا وتیشی: ئێمە بڕوامان بە گفتوگۆ لە دۆخێکی یەکساندا بۆ داهاتووی سووریا لەگەڵ حکوومەتی ناوەندی هەیە بەڵام لە ئێستادا هیچ ئاسۆیێکی ڕوون چاوەڕوانی پەیوەندییەکانی ئێمە و دیمەشق ناکات.
Your Comment