بەپێی هەواڵی کوردپرێس، لەمبارەوە قاسم دەربۆ، ئەندامی فەرماندەیی هێزی پێشمەرگەی کوردستان لە شنگال بە باسنیووز-ی ڕاگەیاندووە: "ئیستا ٩٠٪ی چەکدارانی گرووپە ناشەرعییەکان لە چیای شنگال، خەڵکی بیانین و تەنانەت عەرەبیش لەناو گرووپە ناشەرعییەکانیشدا هەن، بەتایبەتی لەلایەن پەکەکەوە وەرگیراون".

ئەو فەرماندەیە ئاماژەی بەوەش کرد: "زۆربەی ئەو کەسانەی کە خەڵکی شنگال بوون و پێشتر لەگەڵ ئەو گرووپانە کەوتبوون، ئێستا وازیان لێ هێناون، چوونکە خەڵکی شنگال گەیشتوونەتە ئەو قەناعەتەی کە ئەو گرووپە ناشەرعییانە بۆ مەرام و ئامانجی سیاسیی خۆیان لەناو شنگال جێگیر بوون و هەتا ئێستاش ئەو گرووپە بیانییانە قەزای شنگالیان چۆڵ نەکردووە".

قاسم دەربۆ ئاماژەی بەوەش کرد: "ئامانجی ئەوان ئەوەیە، تەناهی و سەقامگیری لەناو شەنگال جێگیر نەبێت، چوونکە باش دەزانن ڕۆژێک دادێت شنگال لەدەستیان نامێنێت، بۆیە کار بۆ تێکدانی ڕەوشی شنگال و ئاڵۆزکردنی زیاتری دەکەن".

کۆدی هەواڵنێر: 60113