بەپێی هەواڵی کوردپرێس، لەم دیدارەدا تەکید کرا لە پەرەپێدانی پەیوەندیەکانی نێوان هەرێمی کوردستان و کۆماری ئیسلامی ئێران بە تایبەتی دەربارەی فراوان کردنی جموجۆڵ و ئاڵوگۆڕی بازرگانی و ئابووری و پیشەسازی کشتوکاڵی.

لەدیدارەکەدا هەروەها جەخت کرایەوە لە کارئاسانی بۆ ئەنجامدانی سەرمایەگوزاری و پیشەسازی خۆراک و بەشداری کردنی ئەزموونی کۆمپانیاکانی وڵاتی ئێران لە دروست کردن و بونیادنانی پرۆژەکانی ئاودێری و بەنداوەکان و کشتوکاڵی و ئاژەڵداری و شیرەمەنی.

هەروەها لە بەشێکی تری دیدارەکە باسی کاریگەریەکانی دیاردەی وشکەساڵی و ئەرکی دەستووری و دراوسێیەتی نێوان هەرێم و ئێران کرا لە پێناو پارێزگاری ودابین کردنی ئاوی هەرێمی کوردستان و عێراق کە بەهۆیەوە زیانی گەورە بەر پرۆژەکان و خاوەن کارو جوتیاران و ژینگە و ئاوی خواردنەوە کەوتووە .

پێشهات و گۆرانکاریەکانی کەش و هەوا و ژینگەی ناوچەکە و بەردەوامیدان بە پەیوەندیەکان تەوەرێکی دیکەی دیدار و گفتوگۆی بوو لەنێوان یاریدەدەری وەزیری دەرەوەی ئێران بۆ کاروباری دیبلۆماسی و بازرگانی لەگەڵ وەزیری كشتوكاڵی هەرێم.