به‌پێی هه‌واڵی کوردپریس، مه‌حما خه‌لیل قائیمقامی قه‌زای شنگال گوتی: "ده‌ستپێكردنه‌وه‌ی چالاكی و جموجۆڵه‌كانی داعش له باشووری شنگال و ده‌شتایی نه‌ینه‌وا مایه‌ی هه‌ڕه‌شه‌یێكی گه‌وره‌یه به تایبه‌ت كه چالاكییه‌كان به شێوه‌یێكی ڕوون تێبینی كراوه و ئه‌م جموجۆڵه‌ش له حاڵه‌تی به‌رده‌وامبوونیدا زیانی گه‌وره به ناوچه‌كه ده‌گه‌یه‌نێت به‌و پێیه‌ی داعش ڕێكخراوێكی مه‌ترسیداره."
قائیمقامی شنگال ده‌ڵێت: "له دوای پاشه‌كشه‌كردنی هێزه‌كانی پێشمه‌رگه، له ئێستادا ته‌نیا حه‌شدی شه‌عبی و هێزه عێراقییه‌كان له‌و ناوچه‌یه‌دان بۆیه پێویسته هه‌وڵه هه‌واڵگرییه‌كان بخرێنه‌گه‌ڕ و ده‌ستپێشخه‌ریی بكرێت له هێرشكردنه سه‌ر چه‌كدارانی گرووپه‌كه."
مه‌حما خه‌لیل گوتیشی: "شنگال ناوچه‌یێكی ستراتێژییه و له ماوه‌ی هه‌فته‌ی ڕابردوودا حكوومه‌تی عێراقمان له جموجۆڵه‌كانی داعش ئاگادار كرده‌وه به‌ڵام تاوه‌كوو ئێستا به‌ده‌نگه‌وه‌هاتن نه‌بوووه."
شایانی باسه؛ شنگال یه‌كێكه له ناوچه كێشه‌له‌سه‌ره‌كانی نێوان هه‌رێم و به‌غدا، له دوای پاشه‌كشه‌كردنی هێزه‌كانی پێشمه‌رگه‌ش له‌و ناوچه‌یه له دوای ڕووداوه‌كانی مانگی تشرینی یه‌كه‌می ساڵی ڕابردوو، هێزه‌كانی حه‌شدی شه‌عبی و هێزه عێراقییه‌كانی‌تر ناوچه‌كه‌یان گرته ده‌ست و له ئێستاشدا ده‌نگۆی ئه‌وه هه‌یه جارێكی‌تر گرووپه چه‌كداره‌كانی داعش له ناوچه‌كه‌دا جموجۆڵ و چالاكییه‌كانیان ده‌ست پێكردبێته‌وه.
سه‌رچاوه: خه‌ڵک
کۆدی هه‌واڵنێر: 60103
Your Comment