بەپێی هەواڵی کوردپرێس، كۆسره‌ت ڕەسووڵ، ئه‌مڕۆ یه‌كشه‌ممه له په‌یامێكدا به بۆنه‌ی راگه‌یاندنی ئه‌نجامه‌كانی هه‌ڵبژاردنی په‌رله‌مانی كوردستانه‌وه له لایه‌ن كۆمسیۆنه‌وه، رایگه‌یاند: "سه‌ره‌ڕای تێبینی و سه‌رنجه‌كانمان له‌سه‌ر پرۆسه‌كه، به‌ڕێوه‌چوونی ئه‌م پرۆسه دیموكراتییه له گه‌لی كوردستان و سه‌رجه‌م هێزو لایه‌نه سیاسییه‌كان پیرۆز ده‌كه‌م و سوپاسی خۆشمان ئاراسته‌ی تاک به‌تاكی كۆمه‌ڵانی خه‌ڵكی كوردستان ده‌كه‌ین كه متمانه‌ی خۆیان به نوێنه‌ره‌كانی خۆیان به‌خشیه‌وه".
ناوبراو وتوشیه‌تی: "له‌دوای كۆتایی هاتنی پرۆسه‌ی هه‌ڵبژاردن و راگه‌یاندنی ئه‌نجامه‌كان، داوا له سه‌رجه‌م هێز و لایه‌نه سیاسییه‌كان ده‌كه‌م قۆناغێكی نوێ ده‌ست پێبكه‌ین و له پێناو به‌رژه‌وه‌ندییه باڵاكانی گه‌له‌كه‌مان لاپه‌ڕه‌یێكی تازه هه‌ڵبده‌ینه‌وه، چوونكه به‌رژه‌وه‌ندیی گه‌لی كورد گه‌وره‌تره له هه‌ر لایه‌نێک كه خۆی له قه‌زیه‌كه به گه‌وره‌تر بزانێ".
کۆسرەت ڕەسووڵ ئاماژه‌ی به‌وه‌شداوه؛ گۆڕانكارییه‌كانی ناوچه‌كه و ئه‌گه‌ره‌كانی به‌رده‌ممان، ئه‌وه ده‌خوازێ كه كاتی ئه‌وه هاتووه هه‌موومان له‌سه‌ر مێزی گفتوگۆ دابنیشین و به‌شداربین له پێكهێنانی حكوومه‌تی داهاتووی هه‌رێمی كوردستان و كاركردنی زیاتر بۆ خزمه‌تی كوردستان و پێشكه‌ش كردنی خزمه‌تگوزاری زیاتر به هاوڵاتیانمان، ئه‌وه‌ش به به‌شداریی هه‌موومان و وه‌لانانی ململانێكانمان ده‌كرێت.
جێگری سكرتێری گشتیی یه‌كێتی به گرنگیشی زانیوه هه‌موو لایه‌نه كوردستانییه‌كان بتوانن پێكه‌وه یه‌ک ده‌ست و به یه‌ک تیم به‌شداربن له پێكهێنانی حكوومه‌تی داهاتووی عێراق و سه‌ندنی ئه‌و ئیستحقاقانه‌ی به‌ر گه‌لی كوردستان ده‌كه‌وێ له پێناو به‌شدارییێکی كاراتر له به‌غدا و به‌ده‌ست هێنانی مافه نه‌ته‌وه‌یی و ده‌ستورییه‌كانی گه‌لی كوردستان.
سەرچاوە: میدیاکانی هەرێمی کوردستان
کۆدی هەواڵنێر: 60113
Your Comment