به‌پێی هه‌واڵی کوردپرێس، ڕۆژی یه‌کشه‌ممه 7ی تشرینی یه‌که‌می 2018 له میانی دیدارێکدا به‌رھه‌م ساڵح تێڕ‌وانینه تایبه‌ته‌کانی خۆیی تاوتوێ کرد سه‌باره‌ت به سروشتی په‌یوه‌ندییه چاوه‌ڕ‌وانکراوه‌کانی نێوان عێراق و ده‌وڵه‌تانی یه‌کێتیی ئه‌ورووپا و ته‌واوی کۆمه‌ڵی نێوده‌وڵه‌تی له چوارچێوه‌ی ئیراده‌یێکی نیشتمانیدا بۆ بنیاتنانی ده‌وڵه‌تی دامه‌زراوه‌یی و پێشکه‌ش کردنی خزمه‌تگوزاریی مۆدێرن و ھاوچه‌رخ.
به‌رھه‌م ساڵح دووپاتی کرده‌وه پێویسته پشتیوانیی بکرێت له حکوومه‌تی داھاتوو، عێراقیش نه‌سووتێنرێت به ئاگری گرژییه ئیقلیمی و نێوده‌وڵه‌تییه‌کان، ڕێککه‌وتننامه‌ی شه‌راکه‌ت له نێوان عێراق و یه‌کێتیی ئه‌ورووپادا چالاک بکرێته‌وه که به ته‌واوی چوووه‌ته بواری جێبه‌جێ کردنه‌وه و ئاماژه‌یشی کرد ئه‌م ڕێککه‌وتننامه‌یه میکانیزمی قووڵ کردنه‌وه‌ی په‌یوه‌ندییه‌کانی نێوان ھه‌ردوولا ده‌سته‌به‌ر ده‌کات و پشتیوانیی کردنی عێراق به‌ھێز ده‌کات بۆ به‌ره‌نگار بوونه‌وه‌ی ھه‌ڕ‌ه‌شه‌کانی به‌رده‌م ئۆقره‌یی و گه‌شه‌پێدانی ئابووری و سیاسی.
له به‌شێکی‌تری وته‌کانیدا سه‌رۆک به‌رھه‌م ساڵح بایه‌خدانی شه‌خسیی خۆی دووپات کرده‌وه به گوێ گرتن له ھه‌ر بۆچوون و ڕوانین و پێشنیازێک که ببێته فاکته‌ری به‌ھێزکردنی په‌یوه‌ندییه دووقۆڵییه‌کان و ڕوونیشی کرده‌وه پته‌وکردنی په‌یوه‌ندیی دۆستانه و ھاریکاریی له‌گه‌ڵ ته‌واوی ده‌وڵه‌تانی ئه‌ورووپایی گرنگییێکی زیندوو نوێکه‌ره‌وه‌ی ھه‌یه و له‌وباره‌یه‌شه‌وه ئاماده‌یی و نیازی عێراقی نیشان دا بۆ دامه‌زراندنی په‌یوه‌ندییێکی گه‌شه‌کردوو له‌گه‌ڵ یه‌کێتیی ئه‌ورووپادا له‌سه‌ر بناغه‌ی کرانه‌وه و دیالۆگ و ھاریکاریی بنیاتنه‌ر به‌و جۆره‌ی پاراستنی به‌رژه‌وه‌ندییه ھاوبه‌شه‌کان زامن بکات.
سه‌رکۆماری عێراق سوپاس و پێزانینی عێراقیشی ده‌ربڕ‌ی بۆ پشتیوانیی گرنگی ئه‌ورووپا و داوایشی کرد کۆمه‌کی ئه‌ورووپایی و نێوده‌وڵه‌تی زیاتر بکرێن به‌و پێیه‌ی قۆناغی داھاتوو قۆناغی کاری جیدیی ده‌بێت بۆ بنیاتنانی ده‌وڵه‌تی مۆدێرنی دامه‌زراوه‌یی و ماف و ئازادییه دیموکراسییه‌کان و دووپاتیشی کرده‌وه به‌رزکردنه‌وه‌ی پێگه‌ی ژنان زامن کردنی ژیان و مافه‌کانیان و ژیان و مافی ھه‌موو ھاوڵاتییان بێ جیاوازیی، ئامانجه سه‌ره‌کییه‌کانی سه‌رکردایه‌تیی نوێی وڵاته، شانبه‌شانی توندوتۆڵ کردنی یه‌کڕ‌یزیی نیشتمانی و به‌دیھێنانی ئاشتبوونه‌وه و چاککردنی باری ئه‌منی و پێشکه‌ش کردنی خزمه‌تگوزارییه‌کان و به‌گژاچوونه‌وه‌ی گه‌نده‌ڵی، سه‌رباری به‌شداری کردنی کاریگه‌ر و کارای عێراق له پته‌وکردنی پایه‌کانی ئاشتی و ئاسایشی ئیقلیمی و نێوده‌وڵه‌تی.
به‌رھه‌م ساڵح له وته‌کانیدا دووپاتی کرده‌وه سه‌رۆکایه‌تیی کۆمار گرنگییێکی تایبه‌ت ده‌دا به گه‌شه‌پێدانی ئابووریی نیشتمانی و ده‌ستپێکردن به ئاوه‌دانکردنه‌وه و بووژانه‌وه‌ی ژێرخانی ئابووری، کاری جدییش ده‌کات بۆ ده‌رکردنی ئه‌و قانوونانه‌ی که به‌دیھاتنی ئه‌م ئامانجانه زامن ده‌کات، له‌و ڕوووه‌شه‌وه داوای کرد که وه‌به‌رھێنه‌رانی ئه‌وروپایی و جیھانیی پرۆژه‌کانیان زیاتر بکه‌ن له عێراقدا و له‌و باره‌یه‌وه ئاماژه‌ی کرد بۆ پابه‌ند بوون به ده‌سته‌به‌رکردنی ھه‌موو زامنێکی ئه‌منی و قانوونی بۆ ئاسانکاریی ئه‌م بواره.
باڵیۆزانی یه‌کێتیی ئه‌ورووپاش گه‌شبینی و متمانه‌ی گه‌وره‌ی حکوومه‌ته‌کانیان ده‌ربڕ‌ی که سه‌رۆکایه‌تیی نوێی کۆماری عێراق ده‌توانێت له ئاینده‌دا که‌ش و ھه‌وایه‌کی ساز و گونجاو بخوڵقێنێت بۆ ھاریکاریی پڕ به‌رھه‌م و زیندوو، بایه‌خدانی ده‌وڵه‌ته‌کانیشیان دووپات کرده‌وه بۆ گه‌شه‌پێدانی په‌یوه‌ندیی ھاریکاریی و کاری ھاوبه‌ش له‌گه‌ڵ عێراق و پشتیوانی کردنی ئۆقره‌یی و گه‌شه‌کردنی سیسته‌مه دیموکراسییه فیدراڵییه‌که‌ی و پێشکه‌وتنی به به‌رده‌وامیی به‌ره‌و تاوسه‌ندن و گه‌شه کردن.
سه‌رچاوه: میدیاکانی هه‌رێمی کوردستان
کۆدی هه‌واڵنێر: 60103
Your Comment