به‌پێی هه‌واڵی کوردپرێس، ڕۆژی 22ی 9ی 2018 به ‌فه‌رمی له‌لایه‌ن حكوومه‌تی عێراقه‌وه‌ دوو خاڵی گومرگی له‌سه‌ر ڕێگه‌ی که‌رکووک بۆ شاره‌كانی هه‌ولێر و سلێمانی كرانه‌وه‌ و به‌پێی میدیاكانیش گومرگ له‌ ئۆتۆمبێلی بارهه‌ڵگر وه‌رده‌گیرێت و له‌وباره‌وه‌ ساماڵ عه‌بدولڕه‌حمان به‌ڕێوه‌به‌ری گشتیی گومرگ له‌ هه‌رێمی كوردستان به ‌SNNی ڕاگه‌یاند: دانانی بنكه‌ی گومرگی له‌سه‌ر ڕێگه‌ی نێوان که‌رکووک بۆ هه‌ولێر و سلێمانی پێچه‌وانه‌ی ئه‌و به‌رنامه ‌و گفتوگۆیانه‌یه‌ كه‌ له‌ كۆبوونه‌وه‌كانمان له‌گه‌ڵ وه‌فدی باڵای عێراقی كردوومانه‌.

به‌ڕێوه‌به‌ری گشتیی گومرگی هه‌رێمی کوردستان دانانی ئه‌و دوو بنكه‌یه‌ی به ‌نایاسایی وه‌سف كرد و وتیشی: "له‌ كۆبوونه‌وه‌كانمان له‌گه‌ڵ وه‌فدی عێراقی هه‌میشه‌ دووپاتی ئه‌وه‌مان كردۆته‌وه‌ له‌گه‌ڵ یه‌كگرتنه‌وه‌ی پێناسه‌ی گومرگی، بازگه‌ی سه‌فره‌ دابنرێت و ئێستاش نازانین ئه‌و بازگانه‌ به‌دیله‌ بۆ بازگه‌ی سه‌فره‌ یاخود نا".

ناوبراو ئه‌وه‌شی ئاشكرا كرد: دانانی گومرگ له ‌نێوان شاره‌كانی یه‌ک وڵاتدا پێچه‌وانه‌ی یاسایه ‌و ناڕاسته‌وخۆ جیاكردنه‌وه‌ی جوگرافیای هه‌رێمه‌ له‌گه‌ڵ ناوه‌ند و له‌ كۆبوونه‌وه‌ی داهاتووشماندا له‌گه‌ڵ به‌غدا ئه‌گه‌ر ئه‌نجام بدرێت بابه‌تی دانانی گومرگ به‌ جدی وه‌رده‌گرین كه‌ تا ئێستاش شێوازی كاركردنیان نازانین.

ساماڵ عه‌بدولڕه‌حمان زانیاریی زیاتری له‌وباره‌شه‌وه‌ خسته ‌ڕوو و وتی: "هه‌ر به‌رهه‌مێک له ‌ئێران و توركیاوه‌ هاورده‌ بكرێت له‌لایه‌ن هه‌رێمه‌وه‌ گومرگ ده‌كرێت، به ‌وه‌رگرتنه‌وه‌ی دووباره‌ی پاره‌ی گومرگیش به ‌مانای جیاكردنه‌وه‌ی هه‌رێمه‌ له ‌عێراق جگه‌ له‌وه‌ش هیچ مانایێكی‌تر نابه‌خشێت".

کۆدی هه‌واڵنێر: 60103