به‌پێی هه‌واڵی کوردپرێس، پاشنیوه‌ڕۆی ڕۆژی سێشه‌ممه 11ی ئه‌یلوولی 2018 نێچیرڤان بارزانى سه‌رۆكوه‌زیرانى هه‌رێمى كوردستان پێشوازى له‌ برێت مه‌كگۆرک نوێنه‌ری سه‌رۆكی ئه‌مه‌ریكا بۆ هاوپه‌یمانێتیی نێوده‌وڵه‌تیی شه‌ڕی دژی داعش و شاندێكی یاوه‌ری كرد.

له‌ دیدارێكدا دۆخی سیاسیی ئێستای عێراق، هه‌وڵه‌كان بۆ پێكهێنانی كابینه‌ی نوێی حكوومه‌تی عێراق، دانیشتنه‌كانی په‌رله‌مانی تازه‌ی عێراق و ئه‌گه‌ری پێكهێنانی گه‌وره‌ترین هاوپه‌یمانێتی له‌ په‌رله‌مان وه‌ک هه‌نگاوی یه‌كه‌م بۆ دامه‌زراندنی حكوومه‌تی داهاتووی عێراق خرانه‌ به‌ر باس و گفتوگۆ.

له‌ دیداره‌که‌دا ڕۆڵی هه‌رێمی كوردستان و هاوبه‌شی له‌ پرۆسه‌ی سیاسیی عێراق و پێكهێنانی كابینه‌ی حكوومه‌تی نوێدا گرنگ هه‌ڵسه‌نگێنرا و هه‌ردوولا هیوایان خواست له‌ داهاتوویێكی نزیكدا هه‌وڵه‌كان بگه‌نه‌ ئه‌نجامێک و حكوومه‌تی نوێی عێراق پێكبهێنرێت كه‌ به‌رژه‌وه‌ندیی هه‌موو پێكهاته‌كانی عێراق له‌به‌رچاو بگرێت و وڵات بكه‌وێته‌ قۆناغێكی تازه‌وه‌.

هه‌ردوولا دۆخی سیاسیی هه‌رێمی كوردستان و ئاماده‌كاری بۆ هه‌ڵبژاردنه‌كانی داهاتووی په‌رله‌مانی كوردستانیان له‌ 30 ئه‌یلوولدا خسته‌ به‌ر باس و له‌مباره‌یه‌وه‌ برێت مه‌كگۆرک خۆشحاڵیی خۆی بۆ به‌رێوه‌چوونی هه‌ڵبژاردنه‌كانی هه‌رێمی كوردستان له‌ كاتی دیاریكراوی خۆیدا نیشان دا و هیوای خواست كه‌ پرۆسه‌ی هه‌ڵبژاردن و ده‌نگدان سه‌ركه‌وتووانه‌ به‌ڕێوه‌ بچێت.

تاوتوێ كردنی دواپێشهاته‌كان و دۆخی ناوچه‌كه‌ به‌گشتی لایه‌نێكی دیكه‌ی دیداره‌كه‌ بوو.

سه‌رچاوه‌: ماڵپه‌ڕی فه‌رمیی پارتی دیموکراتی کوردستان

کۆدی هه‌واڵنێر: 60103