به‌پێی هه‌واڵی کوردپرێس، ڕۆژنامه‌ی (یه‌نی شه‌فه‌ق)ی نزیک له حكوومه‌تی توركیا له ڕاپۆرتێكدا ئاماژه‌ی به‌وه داوه دوای چڕبوونه‌وه‌ی هه‌وڵه‌كانی ئه‌نقه‌ر و به‌غدا بۆ كردنه‌وه‌ی ده‌روازه‌ی سنووری ئۆڤاكۆی، كه ئامانج لێی بازرگانیی ڕاسته‌وخۆی نێوان ئه‌و دوو وڵاته و بێ‌كاریگه‌ركردنی ڕۆڵی هه‌رێمی كوردستانه له‌و نێوه‌نده‌دا، ئه‌مریكا دژی ئه‌و هه‌نگاوه وه‌ستاوه‌ته‌وه.
هه‌ر به‌پێی ڕاپۆرتی ئه‌و ڕۆژنامه‌یه، برێت مه‌كگۆرک نێرده‌ی تایبه‌تی سه‌رۆكی ئه‌مریكا زنجیره‌یێک دیداری له‌گه‌ڵ به‌رپرسانی هه‌رێمی كوردستان ئه‌نجام داوه و تیایدا ئاماژه‌ی به‌وه داوه كه سنووره‌كانی نێوان (عێراق - توركیا) له‌لایێک و (عێراق- سووریا) له‌لایێكی دیكه‌وه، له هێزه‌كانی عێراق پاک ده‌كرێنه‌وه و ده‌خرێنه ژێر كۆنتڕۆڵی هێزه‌كانی ئه‌مریكا و هێزه‌كانی پێشمه‌رگه.
ئه‌و ڕۆژنامه‌یه‌ی نزیک له حكوومه‌تی توركیا ئیدعا ده‌کات که پلانه‌كه‌ی ئه‌مریكا به جۆرێكه كه سه‌ره‌تا ته‌له‌عفه‌ر و ده‌وروبه‌ری له هێزه‌كانی حه‌شدی شه‌عبی و سوپای عێراق وه‌رده‌گیرێته‌وه و فڕۆكه‌خانه‌ی ته‌له‌عفه‌ر ده‌خرێته ژێر چاودێریی هێزه‌كانی ئه‌مریكا. ته‌نانه‌ت مه‌كگۆرک له‌و كۆبوونه‌وانه‌دا ڕای‌گه‌یاندوووه كه ئێستا ته‌له‌عفه‌ر له‌ژێر كۆنتڕۆڵی هێزه‌كانی سه‌ر به ئێراندایه و ده‌بێ شاره‌كه له‌و هێزانه پاک بكرێته‌وه و بكه‌وێته‌وه ژێر كۆنتڕۆڵی هێزه‌كانی ئه‌مریكا و هێزه‌كانی پێشمه‌رگه و دواتریش که‌رکووک جارێكی‌تر بكه‌وێته ژێر كۆنتڕۆڵی هێزه‌كانی هه‌رێم.
یه‌نی شه‌فه‌ق هێمای بۆ ئه‌وه‌ش كردوووه ئامانجی ئه‌مریكا له‌و هه‌نگاوه جیا له تێكدانی پڕۆژه‌كه‌ی توركیا و عێراق، به‌كراوه‌یی هێشتنه‌وه‌ی ڕێگای گه‌یاندنی هاوكارییه سه‌ربازییه‌كانیه‌تی بۆ شه‌ڕڤانانی سووریا بۆیه ڕۆژنامه‌كه داوای كردوووه بۆ ڕێگه‌گرتن له هه‌وڵه‌كه‌ی ئه‌مریكا، پڕۆژه‌ی (ئۆڤاكۆی) به‌په‌له جێبه‌جێ بكه‌ن و ده‌روازه‌كه بكه‌نه‌وه.
سه‌رچاوه: ڕادیۆ نه‌وا
کۆدی هه‌واڵنێر: 60103
Your Comment