کوردپرێس:

ئەیمەن شەمەری سەركردە لە هاوپەیمانیی سائیرون كە لەلایەن موقتەدا سەدر رابەری رەوتی سەدرەوە سەرۆكایەتی دەكرێت لە لێدوانێكیدا بۆ ماڵپەڕی (المعلومە)ی عیراقی رایگەیاندووە”هاوپەیمانی ئۆپۆزسیۆنی كوردی كە لە گۆڕان و نەوەی نوێ‌ و هاوپەیمانی بۆ دیموكراتی و دادپەروەریی پێكدێت، رێكەوتوون بۆ هاتنە پاڵ پرۆژەی نیشتمانی كە لێوەی لەگەڵ لایەنە عیراقییەكانی تر دەتوانن بەئاسانی گەورەترین لیست پێكبهێنن و لێوەی حكومەتی زۆرینەی نیشتمانی دروست بكەن”.

ئەو سەركردەیەی هاوپەیمانیی سائیرون دەڵێت”لەگەڵ هاوپەیمانی هێزە نیشتمانییەكان بە سەرۆكایەتی جەمال كەربولی رێكەوتوون، ویڕای رێكەوتن لەگەڵ بەشێك لە هاوپەیمانییەكانی نەسر و وەتەنیە و حیكمە”، لێدوانەكانی دەوڵەتی یاساشی لەبارەی دروستكردنی گەورەترین لیستەوە، بە چەواشەكەر و لێدوانی راگەیاندنەكان ناوبرد.

بە وتەی شەمەری:”یەكێتی هێزە نیشتمانییەكان زیاتر لە 35 پەرلەمانتار لەخۆدەگرێت، لەگەڵ 30 پەرلەمانتاری هاوپەیمانی نەسریش رێكەوتوون تا هاوپەیمانی لەگەڵ سائیرون و وەتەنیە و حیكمەدا بكەن”.

سەبارەت بە هەوڵەكانی دەوڵەتی یاساش بۆ پێكهێنانی گەورەترین لیستی پەرلەمانی، سەركردەكەی هاوپەیمانی سائیرون رایگەیاندووە”ئەوەی لەو بارەیەوە دەوترێت، لێدوانی راگەیاندنەكانە و بۆ چەواشەكردنی رای گشتییە”، رەتیشكردەوە هاوپەیمانی فەتح و لایەنە كوردییەكانی تر تائێستا هەڵوێستی خۆیان لەبارەی چوونە پاڵ دەوڵەتی یاسا یەكلاكردبێتەوە.

لە 12ی ئایاری رابردوو، هەڵبژاردنی پەرلەمانی لە عیراق ئەنجام درا و بەپێی ئەنجامی پرۆسەكەش، هاوپەیمانیی سائیرون بە سەرۆكایەتی موقتەدا سەدر، بە دەستبەركردنی 54 كورسی لە پێشەنگی هاوپەیمانییەكانی تردایە و لە پلەی یەكەمدا ناوی هاتووە، هاوپەیمانی فەتح بە سەرۆكایەتی هادی عامری بە 48 كورسی لە پلەی دوومدایە، هاوپەیمانی نەسر كە لەلایەن حەیدەر عەبادی سەرۆك وەزیرانەوە سەرۆكایەتی دەكرێت، بە 42 كورسی لە پلەی سێیەمی هەڵبژاردنەكەدایە.