بەپێی هەواڵی کوردپرێس، عومەر گوڵپی دامی لیژنەی دارایی پەرلەمانی کوردستان ئەنجامی بەدواداچوونێکی لەبارەی بودجە و داهاتی حکوومەتی هەرێم بڵاو دەکاتەوە و دەڵێت: "ئەمساڵ لە کۆتایی‌ مانگی‌ 10 نزیک دەبینەوە و هیچ باسێک لە پڕۆژە یاسای‌ بوودجە نییە، هەروەها لە ساڵی‌ 2014ەوە هەرێم خۆی‌ بەرپرسیاری‌ سیاسەتی‌ ئابووریی‌ خۆی‌ لە ئەستۆ گرتووە و بەستنەوەی یاسای بوودجە بە چاوەڕوانی‌ بەشە بوودجەی‌ بەغدا پاساوێکی ڕاست نییە، چوونکە ئەنجومەنی‌ وەزیران دەتوانێت بە داهاتی‌ خۆی یاسای‌ بودجە دابڕێژێت ‌و لە پەرلەمانەوە پەسەند بکرێت".

ناوبراو باسی لەوەش کردووە، لەئێستادا هەرێمی‌ کوردستان مانگانە داهاتی‌ زیاترە لە یەک ترلیۆن‌ و دووسەد و چل ملیار دیناری‌ مانگانە، کە 290 ملیار دیناری‌ زیاترە لە خەرجییەکانی‌ مانگانە بۆ هەموو بوارەکان کە 950 ملیار دینارن بە مووچەی‌ تەواویشەوە، "ئیتر بۆ ناکرێت ئەم داهات ‌و خەرجیانە لە چوارچێوەی‌ یاسای‌ بوودجە ڕێک بخرێن؟ چی‌ ڕێگرە؟ کێ ڕێگرە؟ ئەنجومەنی‌ وەزیران پارەی‌ کوردستان چی‌ لێدەکات؟".

عومەر گوڵپی دەڵێت: "یاسای بوودجه‌ ئه‌گه‌ر به‌ بابه‌تیانه‌ و زانستیانه‌ و یاساییانه‌ مامه‌ڵه‌ی‌ له‌گه‌ڵ بكرێت ده‌بێته‌ هۆی‌ دیاریی‌‌ و شه‌فافی‌ داهات ‌و خه‌رجی‌، بە یاسایی‌ مامەڵە لەگەڵ مووچەی‌ مووچەخۆراندا بکرێت بەتایبەت سەبارەت بە پلە بەرزکردنەوەی‌ فەرمانبەران، هەروەها ساڵانە بە پێی‌ یاسا و دادگەرانە بوودجە بۆ دامەزراندن ‌و بوارە جیاجیاکان تەرخان بکرێت، هەموو ئەمانەش واتە پلان ‌و بەرنامەی‌ دارایی ‌‌و ئابووری‌".