بەپێی هەواڵی کوردپرێس، عەبدولوەهاب سلێمان، بەڕێوەبەری شوێنەواری سۆران بە تۆڕی میدیایی رووداوی راگەیاندووە: "ئەو گلێنانە نەخشێندراون کە نەخشی مرۆڤی، ئاژەڵی، نەخشی ئەندازیاری و هەروەها نەخشی فەلەکیشیان لەسەرە.

شوێنەکە گردی بانەهێلکی سۆرانە، تیمەکانی هەردوو زانکۆی ئۆتۆنۆموسی بەرشلۆنە و زانکۆی سەلاحەدین کاری تێدا دەکەن، شوێنەکە ناوچەیەکی ئاوەدانییە، لە رووبەری 500 مەتری دووجا، پارچەی شوێنەواری زۆر دەست تیمە شوێنەوارییەکە کەوتوون.

ئانا گۆمێز، سەرۆکی تیمی زانکۆی ئۆتۆنۆموسی بەرشلۆنەیە و دەڵێت، "هەندێک کەلوپەلمان دۆزینەوە کە لە ژیانی رۆژانەدا بەکاردەهێندران وەکوو بازنگ و ملوانکە، هەروەها کەلوپەلی بواری کشتوکاڵیش."

سرود تاڵیب، مامۆستای زانکۆی سەلاحەدین دەڵێت، کەلوپەلەکان هی سەردەمێکن کە سەردەمی پێش مێژووە، سەردەمی گەشەسندنە و بەرەو کۆمەڵگە چوونە، "سەردەمێکی هەستیارە لە کوردستان و زۆر گرنگە لە سەری بزاندرێت."

ساڵی 1950 تیمی زانکۆی شیکاگۆی ئەمریکی، هەمان ئەو تیمەی گوندی چەرمۆیان بە یەکەم ناوچەی کشتوکاڵی لە جیهاندا ناساند، بانە هێلکیان لەسەر نەخشەی شوێنەواری نووسییەوە.