به‌پێی هه‌واڵی کوردپرێس، له وتاری ھه‌ینی ڕابردوودا نوێنه‌ری سیستانی نه‌خشه‌ڕێگایێكی بۆ چاره‌سه‌ركردنی قه‌یرانه‌كانی عێراق خسته‌ڕوو و داوای كرد له زووترین واده‌دا كابینه‌ی نوێ حكوومه‌ت ڕابگه‌یێنرێت و یاساكان له په‌رله‌مان ھه‌موار بكرێنه‌وه له‌وانه‌ش "یاسای ھه‌ڵبژاردن، گۆڕینی كۆمیسیۆن، ھه‌ڵوه‌شانه‌وه‌ی ئیمتیازاتی ھه‌ر سێ سه‌رۆكایه‌تییه‌كه و وه‌زیره‌كان و په‌رله‌مانتاران و پله تایبه‌ته‌كان و داواشی كرد دۆسیه‌كانی گه‌نده‌ڵی به بێ ھیچ به‌ربه‌ستێک له دادگا لێكۆڵینه‌وه‌ی له‌سه‌ر بكرێت.
پاش نیوه‌ڕۆی ڕۆژی هه‌ینى 3ی ئاب له پارێزگاكانی باشووری عێراق خۆپیشاندان و ده‌ربڕینی ناڕه‌زایی ده‌ستی پێكرده‌وه و لیژنه‌كانی هه‌ماهه‌نگیی خۆپیشاندانه‌كانیش داوا له هاووڵاتییان ده‌كه‌ن به‌شداری تێدا بكه‌ن.
به‌ڕێوه‌چوونی خۆپیشاندان له‌و پارێزگایانه هاوكاته له‌گه‌ڵ به‌رده‌وامیی مانگرتنی به‌شێک له دانیشتوووانی پارێزگای به‌سره له به‌رده‌م كێڵگه نه‌وتییه‌كانی قوڕنه و له‌وباره‌وه پۆلیسی عێراق ڕای‌گه‌یاند: "خۆپیشاندانه‌كان جگه له به‌غدا شه‌ش پارێزگای ناوه‌ڕاست و خوارووی عێراقی گرتۆته‌وه."
پۆلیسی عێراق ئاشكرای كرد: "سه‌دان خۆپیشانده‌ر له ناحیه‌ی ئیمام سادقی باكووری به‌سره بۆ ڕۆژی حه‌وته‌م له‌سه‌ریه‌ک به‌رده‌وامن له مانگرتن و گه‌مارۆدانی وێستگه‌یێكی گه‌وره‌ی نه‌وت."
لای خۆیشیه‌وه عه‌لی مه‌نسووری ئه‌ندامی لیژنه‌ی ڕێكخه‌ری مانگرتنه‌كه ڕای‌گه‌یاند: "مانگرتوووه‌كان سه‌رجه‌م ڕێگاكانی گه‌یشتن به كۆمپانیا نه‌وتییه‌كانیان داخستوووه و تا جێبه‌جێ كردنی سه‌رجه‌م داواكارییه‌كانیان مانگرتنه‌كه‌یان ناشكێنن.
شایانی باسه؛ خۆپیشاندانه‌كانی عێراق ماوه‌ی مانگێكه له پارێزگاكانی ناوه‌ڕاست و باشوور درێژه‌ی هه‌یه و هێزه ئه‌منیه‌كانیش له چه‌ند ناوچه‌یێک به توندی ڕووبه‌ڕووی خۆپیشانده‌ران بوونه‌ته‌وه و ئه‌مه‌ش له كاتێكدایه که ڕێكخراوه‌كانی مافی مرۆڤ داوایان له ده‌زگا ئه‌منییه‌كانی عێراق كرد به شێوه‌یێكی باش مامه‌ڵه له‌گه‌ڵ خۆپیشانده‌راندا بكه‌ن.
سه‌رچاوه: Kurdistan TV
کۆدی هه‌واڵنێر: 60103
Your Comment