کێشەی ئێمەی  رۆژنامەنووس و سیاسی کورد یا نوخبەی رۆژهەڵات ئەوەیە،  بەردەوام  لێکدانەوەو شرۆڤەکانمان بۆ رووداو  ئاشکراکردنی سکەنداڵەکان (فەزیحەکان)  رووکەشانەو نا میتۆدانەیە و ناچینە قووڵایی جەوهەری ململانێکانی کۆمەڵگای ئەمریکی.

ئەو ململانێیانەش چەندین رەهەندی سیاسی و ئابووری و کەلتووری  و ئاینی  و ئایدۆلۆجی هەیە، بازدان  بەسەر ئەو ڕەهەندانە، و قەتیسکردنی شرۆفەو تێگەیشتنەکانمان  بۆ ئەو ڕووداو پێشهاتانە تەنها لە ڕەهەندی ( ئەخلاقی- مۆڕالی). 
دەبێتە مایەی سەرلێشواندن و خولانەوەیەکی بێ هودە لەناو بازنەیەکی داخراو. کە ناتوانین بەشێوەیەکی لۆژیکی،  لە شێوازی سروشتی قەیرانی ناوخۆی ئەمریکا بگەین، هەروەها ناتوانین قوڵایی ململانێکان و هاوکێشە سیاسیەکان و سروشتی ململانێکان و لێکەوتەو دەرئەنجامەکانی ئەو ململانێیە بەرجەستە بکەین. 

ئەمڕۆ لەئەمریکا ململانێکی توندی سیاسی و ئایدۆلۆجی و ئابووری و کۆمەڵایەتی و کەلتووری  هەیە.

لە ڕووخساری سیاسییەوە، ململانێکە زۆرجار بە شێوەی پێشبڕکێی نێوان پارتەکانی دیموکرات و کۆماری دەردەکەوێت. بەڵام ئەم وێنەیە تەنها بەشێکە لە ڕاستییەکە. 
لە ناوەڕۆکدا، ململانێکە تەشەنەی کردووە بۆ ململانێی نێوان “سیستەم” و دامەزراوە جێگیرەکان (دەزگا ئەمنییەکان، میدیای تەقلیدی و سەرمایەدارە گەورەکان) لەلایەک، و لەلایەکی تر ڕەوتێکی پۆپۆلیستی کە ترەمپ نوێنەرایەتی دەکات.

لە دیدگای دامەزراوە بیرۆکراتیەکانی دەوڵەتی ئەمریکادا، ترەمپ وەک هێزێکی تێکدەرەوە وەک “هەڕەشە” یا وەک ڤایرۆسێک بۆ سەر سیستەم دەبینرێت؛ چونکە هەوڵ دەدات شێواز و کۆدەکانی بەڕێوەبردنی دەوڵەت بگۆڕێت بۆ دەسەڵاتی تاکەڕەوی و شێوازی فەوضا. بۆیە سیستەم بە هەموو ئامرازەکانەوە هەوڵی سنووردارکردن و کۆنترۆڵکردنی ئەم ڕەوتە  دەدات.

جگەلەوە ململانێکە لە سیاسییەوە گۆڕاوە بۆ ململانێکی کولتوری و ئایینی. بۆ نموونە: پرسی لەباربردنی منداڵ مافی چەک و پەروەردەی ڕەگەزی لە قوتابخانەکان ئەم بابەتانە کۆمەڵگەی ئەمریکییان کردووە بە دوو بەرەی دژ بەیەک کە هیچ کامیان ئامادە نین گوێ لەوانی تر بگرن.
لێرەوە  دەتوانین جۆری ململانێکان  بۆ چەند رەهەندێکی جیاواز پۆلین بکەن.

ململانێی نیوان لیبراڵەکان و محافزکارەکان( نەریت خوازەکان).

ململانێی نیوان ئەمریکیە رەسەنەکان و بێگانەو کۆچبەران.

ململانێی  ئاینی  مەزهەبی نێوان پرۆستانی میانڕەو کاسۆلیەکان لەلایەک     و بەرەی (ماگا- MAGA) لەلایەکی تر، ئەم بەرەیە خۆی لەکریستیانی ( ئینجیلی) سپی پێستەکان و نەتەوەییەکان (قەومیەکان) و  نەریتخوازەکانیش دەدۆزێتەوە. 

ململانێنی ئابووری کراوەو لیبرالی گڵۆباڵ و ئابووری دەوڵەتی داخراو.

ململانێنی چینی ناوەند لەگەل دەسەڵات، لەساڵی پار (٢٠٢٥)  (٢٧١ )هەزار فەرمانبەر لەکارەکانیان دەرکراون، بەپێی ئامارەکان  ئەگەری هەیە لەم ساڵ(٢٠٢٦)  ئەو ژمارەیە بگاتە( ٣١٧ )هەزار فەرمانبەر.
 

ئەم نووسینە درێژەی دەبێت. هەوڵدەدەین زیاتر ئەو خاڵانەی سەرەوە  ڕوون بکەینەوەو و شی بکەینەوە.