بەپێی هەواڵی کوردپرێس، جووڵانەوەی نەوەی نوێ، لە ڕاگەیەندراوێكدا بڵاویكردەوە، شاسوار عەبدولواحید، سەرۆکی جووڵانەوەكە لەگەڵ هەردوو فراکسیۆنی نەوەی نوێ لە پەرلەمانی عێراق و کوردستان کۆ بوەوە و قسە لەسەر دوایین پێشهات و گۆڕانکاریەکانی عێراق و ناوچەکەو ئامادەکارییەکان بۆ هەڵبژاردنی پەرلەمانی عێراق کرا.

ئاماژەی بەوەش كرد، تەوەرێکی دیكەی کۆبوونەوەکە تایبەت بو بە هەوڵەکان بۆ پێکهێنانی بەرەیەکی فراوان لە هێز و لایەنە ئۆپۆزسیۆن و ناڕازیەکان بۆ هەڵبژاردنی پەرلەمانی عێراق.

بەگوێرەی ڕاگەیەندراوەكە، سەبارەت بەو بابەتە جگە لە وەرگرتنی بیروڕای هەموو ئەندامانی هەردوو فراکسیۆنەکە، هاوکات بەکۆی دەنگ بڕیاردرا کە دەرگای نەوەی نوێ بەڕووی هەموو لایەنەکاندا (جگە لە پارتی و یەکێتی) کراوە بێت بۆ هەر کارێکی هاوبەش و هاوپەیمانی و نەوەی نوێ هێڵی سووری لەسەر هیچ کەس و لایەنێک  نییە، جگە لە پارتی و یەکێتی و ئەو گرووپانە نەبێت کە سەر بە دوو حزبی دەسەڵاتن.