بەپێی هەواڵی کوردپرێس، لە بەیاننامەیەکدا بەرێوەبەرایەتی خۆسەر لە کۆبانێ دەلێت، رۆژی سێشەممەی رابردوو، لە ئەنجامی بۆردوومانەکانی تورکیا بۆ سەر گوندی شیرکەی سەر بە شارۆچکەی عەین عیسا لە پارێزگەی ڕەقە ۳ هاوڵاتیانی مەدەنی ژیانیان لە دەست‌داوە و ۳ی دیکەش بریندار بوون.

بەرێوەبەرایەتی خۆسەر لە کۆبانێ، پێشێلکارییەکانی تورکیای بە نامرۆڤانە و قبووڵ‌نەکراو وەسف کردووە، هەروەها دەلێت، تورکیا بەردەوامە لە سیاسەتی شەڕئەنگێزیی خۆی، بەرامبەر ناوچەکانی باکووری رۆژهەڵاتی سووریا و ئەنجامدانی گۆرانکاری دیمۆگرافی، ئەم کردوانەی ئەنقەرە دەچنەوە خانەی تاوانی جەنگ و تاوانەکانی دژ بە مرۆڤایەتی.

لە بەیاننامەکەدا هاتووە، تورکیا: "یاسا نێودەوڵەتییەکان پێشێل دەکات و کۆمەڵکوژی دژی دانیشتووان ئەنجام دەدات، لە کاتێکدا جیهان بەرامبەر بەم  پێشێلکاریانە بێدەنگی هەلبژراتووە".

لە مانگی تشرینی یەکەمی ساڵئ ۲۰۱۹ەوە، لە دوای ئۆپەراسیۆنی سەرێ کانی و گرێ سپی، تورکیا بەبەردەوامی ناوچەکانی باکووری رۆژهەڵاتی سووریا بۆردوومان دەکات، شارۆچکەی عەین عیساش بەهێلی گەرمی نێوان تورکیا و گرووپە چەکدارەکانی ئۆپۆزسیۆنی سووریا لەلایەکەوە و هێزەکانی سووریا دیموکرات لە لایەکی دیکەوە دادەنرێت.