بەپێی هەواڵی کوردپرێس، کەناڵی تەلەفزیۆنیی كوردستان 24 لەبارەی كۆبوونەوەی وەفدی حكوومەت‌ و قوباد تاڵەبانی جێگری سەرۆک وەزیرانی هەرێمی کوردستان، ڕایگەیاند: شاندی حكوومەت دوو پێشنیازیان خستوەتە بەردەم تیمی یەكێتی.

پێشنیازی یەكەم ئەوە بووە قوباد تاڵەبانی ‌و تیمەكەی پێكەوە بگەڕێنەوە كۆبوونەوەكانی ئەنجومەنی وەزیران‌ و لەوێ قسە لەسەر كێشەكان‌ و چارەسەركانی بكرێت.

پێشنیازی دووەم ئەوە بووە كە سەرەتا تیمی وزاری یەكێتی بگەڕێتەوە كۆبوونەوەكانی ئەنجومەنی وەزیران، دواتر قوباد تاڵەبانی بگەڕێتەوە.

قوباد تاڵەبانی ‌و تیمی وەزاری یەكێتی بۆچوونێكی پێچەوانەیان هەبووە، داوایان كردووە سەرەتا كێشە ‌و داواكارییەكانیان جێبەجێ بكرێت دواتر ئەوان دەگەڕێنەوە كۆبوونەوەكانی ئەنجومەنی وەزیران.

داواكارییەكانی تیمی وەزاری یەكێتی پەیوەندی بە پرسی ناردنی پارە و دۆخی دارایی پارێزگای سلێمانییەوە هەبووە، هەروەها چارەسەركردنی ئەو پرسە ئەمنیانەی لەچەند مانگی رابردوو ڕوویان دا.