بەپێی هەواڵی کوردپرێس، لە پەیوەندییەکەدا هەردوولا بە درێژی گفتوگۆیان دەربارەی کێشەکانی نێوان هەرێمی کورستان و حکوومەتی فیدراڵی کرد، بەتایبەتی سەبارەت بە بابەتی بودجەوە.

سەرۆکی حکوومەتی هەرێم پێشنیاری کردووە کە ویلایەتە یەکگرتووەکانی ئەمریکا و نەتەوە یەکگرتووەکان، بە شێوەیێکی کارا و لە ئاستێکی باڵادا، بەشداربن لە چارەسەکردنی کێشەکان و گەیشتن بە ڕێککەوتن لە نێوان هەرێم و حکوومەتی فیدراڵی لە سەر بنەمای دەستوور.

مەسروور بارزانی هەروەها سوپاسی هەڵوێستی وەزیری دەرەوەی ئەمریکای کرد کە خوازیارە هەرێمی کوردستان بەشێوەیێکی دادپەروەرانە بەشی خۆی لە بودجەی فیدراڵی بەرکەوێت. هەروەها سوپاسی پۆمپێیۆی کرد بۆ پشتیوانی بەردەوامیی لە هەرێمی کوردستان لەماوەی كاركردنيدا.

هەروەها لە پەیوەندییەکەدا جەخت لە گرنگیی پەرەپێدانی زیاتری پەیوەندییەکانی نێوان هەرێمی کوردستان و ئەمریکا کرایەوە، بە تایبەتی لە بواری وزەدا. سەرۆکی حکوومەتی هەرێم ئاماژەی بە گرنگیی بەردەوام بوونی یارمەتییەکانی ئەمریکا کرد بۆ هێزی پێشمەرگە و هەروەها یارمەتییە تەکنیکییەکانی USAID.

لە تەوەرێکی دیکەی پەیوەندییەکەدا، ئاستەنگەکانی بواری سەقامگیریی ئەمنیی لە ناوچەکە و نەهێشتنی گرژییەکان لە سەر سنووری هەرێمی کوردستان و سووریا و گرنگیی جێبەجێ کردنی ڕێککەوتننامەی شنگال تاوتوێ کران لە پێناو گەڕانەوەی ئاوارەکان بۆ شوێنەکانیان.

کۆدی هەواڵنێر: 60113