«مەحموود محەمەد» ئەندامی مەکتەبی سیاسیی پارتی یەکێتی دیموکراتیک (P.Y.D.K) لە گفتوگۆ لەگەڵ کوردپرێسدا ئاماژەی دا بە دانوستانەکانی نێوان ئەنجومەنی نیشتمانیی کورد (ENKS) و حزبەکانی یەکێتیی نیشتمانیی کورد (PYNK) ڕایگەیاند: ئێمە لە یەکەم ڕۆژەوە پێشوازیمان لە دەستپێشخەرییەکەی ژەنراڵ کۆبانی کرد لەبارەی یەکگرتنی نێوان لایەنە کوردییەکانی سووریا و پێبەندیشی دەبین.

ناوبراو زیادی کرد: بەڵام کێشەیێک هەیە و ئەوەش ئەمەیە کە ئێمە ڕازی نین بە مەرجەعی باڵای کورد چوونکە ئەم مەرجەعە تەنها لەنێوان دوو لایەندا پێکهاتووە.

مەحموود محەمەد وەبیری هێنایەوە: دەبێت ئەم دەستپێشخەرییەی ژەنراڵ کۆبانی هەموو حزب و لایەنە کوردییەکان و کەسایەتییە سەربەخۆکانی بگرتایەتەبەر.

ئەندامەکەی مەکتەبی سیاسیی پارتی یەکێتی دیموکراتیک (P.Y.D.K) جەختی کردەوە: دەبوو پێش هەموو شتێک کۆنگرەیێکی نەتەوەیی لە کوردستانی سووریا ببەسترایەت و لە ڕێگای کۆنگرەکەوە مەرجەعی باڵای کورد هەڵبژێردرایەت.

مەحمەوو محەمەد وەبیریشی هێنایەوە: دەبێت بڵێم ئێمە وەکوو یەکێتی لە ڕابردوویش و لە ئێستاشدا پشتیوانی لە هەر دانوستانێک دەکەین کە بە مەبەستی یەکگرتن ئەنجام بدرێت و لە داهاتوویشدا پشتگیری لێدەکەین. پێویستە لە هەر دانوستانێکدا هەموو نوێنەرانی میللەت ئامادە بن.

کۆدی هەواڵنێر: 60113