بەپێی هەواڵی کوردپرێس، لاهور شێخ جه‌نگی هاوسه‌رۆکی یه‌کێتیی نیشتمانیی کوردستان له په‌یامێکدا به بۆنه‌ی جه‌ژنی ره‌مه‌زانه‌وه "پیرۆزبایی ئاڕاسته‌ی خوشک و برا مسوڵمانه‌کان له هه‌رێمی کوردستان و عێراق و جیهان و که‌سوکاری سه‌ربه‌رزی شه‌هیدان، پێشمه‌رگه قاره‌مانه‌کان، کارمه‌ندانی ته‌ندروستی، هێزه‌کانی ئاسایشی ناوخۆ، هێزی دژه‌تیرۆر، زیندانییانی سیاسی، که‌مئه‌ندامانی سه‌نگه‌ر و سه‌رجه‌م کۆمه‌ڵانی خه‌ڵکی کوردستان ده‌کات".
لاهور شێخ جه‌نگی هاوسه‌رۆکی یه‌کێتی ده‌ڵێت: "هیوادارم ئه‌م جه‌ژنه ببێته مایه‌ی خێر و خۆشی بۆ گه‌له‌که‌مان".
ئاماژه‌شی به‌وه‌داوه که "له‌م کاته‌دا که جه‌ژن ده‌گێڕین، وڵاته‌که‌مان له به‌رده‌م هه‌ڕه‌شه‌ی داعشدایه، ناوماڵی کورد یه‌کڕیز و ته‌با نییه، کێشه و قه‌یرانی جۆراوجۆر به‌رۆکی گرتوین، هاونیشتیمانییه‌کانمان له که‌رکوک و ناوچه دابڕێندراوه‌کان چاوه‌روانی زیاترمان لێده‌که‌ن، مووچه‌خۆران چاوه‌ڕوانی ڕێککردنه‌وه‌ی موچه‌کانیانن".
هاوسه‌رۆکی یه‌کێتیی نیشتمانیی کوردستان راشیگه‌یاندووه که "هه‌ق وایه لایه‌نه سیاسییه‌کان ئه‌م جه‌ژنه بکه‌نه بۆنه‌یه‌ک بۆ یه‌کتر قبووڵکردن و وه‌لانانی گرژیی و ناکۆکییه‌کان، دوور له چه‌قبه‌ستوویی سیاسی و یه‌کتر تۆمه‌تبارکردن، کار بۆ هێنانه‌دی یه‌کڕیزیی نیشتیمانی و ئاشتی و ته‌بایی بکه‌ن".
ئه‌مه‌ش ده‌قی په‌یامه‌که‌یه:
به‌ناوی خودای گه‌وره‌و میهره‌بان
به بۆنه‌ی هاتنه‌وه‌ی جه‌ژنی ڕه‌مه‌زانی پیرۆزه‌وه، له ناخی دڵمه‌وه گه‌رمترین پیرۆزبایی ئاڕاسته‌ی خوشک و برا مسوڵمانه‌کانمان ده‌که‌م له هه‌رێمی کوردستان و عێراق و جیهان، پیرۆزبێت له که‌سوکاری سه‌ربه‌رزی شه‌هیدان، له پێشمه‌رگه قاره‌مانه‌کان له کارمه‌ندانی ته‌ندروستی و هێزه‌کانی ئاسایشی ناوخۆ و هێزی دژه‌تیرۆر و زیندانییانی سیاسی و که‌مئه‌ندامانی سه‌نگه‌ر و سه‌رجه‌م کۆمه‌ڵانی خه‌ڵکی کوردستان، هیوادارم ئه‌م جه‌ژنه ببێته مایه‌ی خێر و خۆشی بۆ گه‌له‌که‌مان.
ئاشکرایه، مسوڵمانان له مانگی پیرۆزی پڕ خێر و به‌ره‌که‌تی ڕه‌مه‌زاندا به ڕۆژوو ده‌بن و نزا ده‌که‌ن و ئه‌و مانگه ده‌که‌نه ده‌رفه‌تێک بۆ به‌خۆداچوونه‌وه و پاکبوونه‌وه‌ی دڵ و ده‌روون و نوێبوونه‌وه‌ی ژیان، جه‌ژنیش ده‌که‌نه ده‌رفه‌تێک بۆ لێبووردن و گه‌ردن ئازادی له یه‌کتر، ئێمه‌ش له‌م کاته‌دا که جه‌ژن ده‌گێڕین، وڵاته‌که‌مان له به‌رده‌م هه‌ڕه‌شه‌ی داعشدایه، ناوماڵی کورد یه‌کڕیز و ته‌با نییه، کێشه و قه‌یرانی جۆراوجۆر به‌رۆکی گرتوین، هاونیشتیمانییه‌کانمان له که‌رکوک و ناوچه دابڕێندراوه‌کان چاوه‌روانی زیاترمان لێده‌که‌ن، مووچه‌خۆران چاوه‌ڕوانی ڕێککردنه‌وه‌ی موچه‌کانیانن، هه‌ق وایه لایه‌نه سیاسییه‌کان ئه‌م جه‌ژنه بکه‌نه بۆنه‌یه‌ک بۆ یه‌کتر قبووڵکردن و وه‌لانانی گرژیی و ناکۆکییه‌کان و به گیانێکی نیشتیمانپه‌روه‌ری، دوور له چه‌قبه‌ستوویی سیاسی و یه‌کتر تۆمه‌تبارکردن، کار بۆ هێنانه‌دی یه‌کڕیزیی نیشتیمانی و ئاشتی و ته‌بایی بکه‌ن، له پێناو خزمه‌تکردنی کۆمه‌ڵانی خه‌ڵکی کوردستان و چاره‌سه‌رکردنی کێشه‌کان و زاڵبوون به‌سه‌ر ئاڵنگارییه‌کان و تێپه‌ڕاندنی قه‌یرانه‌کان و دابینکردنی خۆشگوزه‌رانی و ئارامی و ژیانێکی شایسته بۆ هاووڵاتییان.
ئێمه له سه‌رۆکایه‌تیی یه‌کێتیی نیشتیمانیی کوردستان هاونیشتیمانییه‌کانمان له که‌رکوک و خانه‌قین و ناوچه‌دابڕێندراوه‌کان دڵنیا ده‌که‌ینه‌وه که سیاسه‌ت و به‌رنامه‌ی یه‌کێتیی کارکردنه بۆ گه‌ڕانه‌وه‌ی هاوسه‌نگی و ڕزگارکردنیان له‌و دۆخه دژواره‌ی که تێی که‌وتوون، دووپاتی ده‌که‌ینه‌وه که له دوای جه‌ژن ئه‌نجامی هه‌وڵ و هه‌نگاوه‌کانمان له‌و پێناوه‌دا ده‌رده‌که‌ون.
په‌روه‌ردگاری مه‌زن خاک و خه‌ڵکی کوردستان له هه‌موو نه‌هامه‌تی و کێشه‌یه‌ک به دوور بگرێت و مرۆڤایه‌تیش له په‌تای نه‌گریسی کۆرۆنا ڕزگار بکات، نوێژ و ڕۆژوو و نزای هه‌موو لایه‌ک قبووڵ بێت و ڕۆژانی جه‌ژن به سه‌لامه‌تی و شادی و سه‌رفرازیی به‌سه‌ر ببه‌ن. دووباره جه‌ژنتان پیرۆز بێت و هه‌ر له شادی و سه‌رکه‌وتندابن.
کۆدی هەواڵنێر: 60113
Your Comment