کوردپرێس:

تیمی لێکۆڵینەوەی نەتەوە یەکگرتووەکان یونیتاد لە تویتەر بڵاوی کردەوە، کەریم خان راوێژکاری تایبەت و سەرۆکی دەستەی نەتەوە یەکگرتووەکان تایبەت بە لێکۆڵینەوە لە تاوانەکانی داعش لە عێراق و سوریا رایگەیاندوە، داعش لە عێراق بەرنامەیێکی چەکی کیمیایی فراوانی هەبووە و لەسەر بەندکراوەکان تاقیکردووەتەوە بۆ زانینی کاریگەرییە بایۆلۆجی و کیمیاییەکان.

دەشڵێت، قوربانیانی دەستی داعش مافی خۆیانە دادپەروەرانە مامەڵەیان لەگەڵ بکرێت و نەوەی داهاتوش لە شوێنێکدا بژین کە ئەمنییەتی پارێزراو و ئاسایشی بەرقەراربێت.

تیمی لێکۆڵینەوەی نەتەوە یەکگرتووەکان تاوەکو ئێستا شەش راپۆرتی پێشکەشی ئەنجوومەنی ئاسایش کردووە، کە تێیاندا سەدان بەڵگەی ڤیدیۆیی، بەڵگەنامەی نووسراو، لێدوانی قوربانیان و شایەتحاڵانی تێدایە.

یونیتاد، لە راپۆرتەکانی پێشوویاندا باسیان لەو تاوانانە کردووە کە داعش دژی کوردانی ئێزدی و شەبەک و خەڵکی دیکەی ئەو ناوچانەی عێراق کردووە کە لە لایەن داعشەوە کۆنترۆڵ کرابوو.

منصوررحیمی