کوردپرێس:

عەبدولڕەحمان ئاپۆ ئەندامی لیژنەی ناوەندیی پارتی دیموکراتی کوردستانی سووریا (PDK-S) لە لێدوانێکدا بۆ کوردپرێس ئاماژەی بە سەردانەکەی ئەم دوایییەی نێچیرڤان بارزانی سەرۆکی هەرێمی کوردستان بۆ تورکیا کرد و دەڵێت: سەردانەکە لە چوارچێوەی ئەو دیدارانە ئەنجام درا کە بەڕێز نێچیرڤان بارزانی سەرۆکی هەرێمی کوردستان بڕیار بوو لەگەڵ بەرپرسانی باڵای وڵاتانی هەرێمی ئەنجامی بدات.

ئاپۆ گوتیشی: هەرێمی کوردستان بە مەبەستی خۆبواردن لە ململانێی هەرێمی و پارێزگاری کردن لە مافی هاووڵاتییانی کورد و هاوکاریی ئابووری و بەرژەوەندیی خەڵکی کورد لە بەشەکانی دیکەدا لەگەڵ وڵاتانی دراوسێ دیدار دەکات.

ناوبراو ئاشکراشی کرد: دیداری فەرمیی بەڕێز نێچیرڤان بارزنی لەگەڵ بەرپرسانی تورکیا لە چوارچێوەی هەمان جووڵە دیپڵۆماسییانەدا ئەنجام درا و دوێنێ لە بەغدا بوو ئەمڕۆکە لە تورکیا. لەگەڵ ئەوەش هەموومان دەزانین کە تورکیا کێیە! سبەینێش یان دوسبەی و ڕۆژانی داهاتووش بۆی هەیە سەردانی وڵاتێکی دیکە بکات.

عەبدولڕەحمان ئاپۆ دووپاتی کردەوە کە سەردانەکانی سەرۆکی هەرێمی کوردستان لە چوارچێوەی جووڵەی دیپڵۆماسییانەی کورد سەردنی گرینگ و پێویستن نەخوازەڵا لەم قۆناغەدا کە کورد لە دۆخێکی ئێجگار هەستیاردایە.

ئەندامی لیژنەی ناوەندیی پارتی دیموکراتی کوردستانی سووریا (PDK-S) لە وەڵامی ئەم پرسیارەشدا کە دیدارەکە چ کارتێکەرییێکی لە سەر دۆخی کوردەکانی سووریا دەبێت بە کوردپرێسی وت بێگۆمان ئەم دیدارە شوێندانەریی ئیجابیی دەبێت لە سەر دۆخی کوردستانی سووریا چوونکە خاڵی هاوبەشی زۆر لە گفتوگۆکانی هەردوولا دەبینرێت.