بەپێی هەواڵی کوردپرێس، دوای ئەوەی لیژنەی تایبەت بە لێکۆلێنەوە لە رووداوی ئاگرکەوتنەوە و سوتانی نەخۆشخانەی ئیبنوخەتیب، راپۆرتی خۆیان پێشکەشی ئەنجومەنی وەزیران کرد، حەسەن تەمیمی وەزیری تەندروستی عێراق، نامەی دەستلەکارکێشانەوەی خۆی ئاڕاستەی ئەنجومەنی وەزیران کرد.

پاش ئەوەش ئەنجومەنی وەزیران دەنگیدا لەسەر راسپاردەکانی لیژنەکە و تیایدا، سزای لەسەرکارلادانی بۆ هەریەکە لە بەڕێوەبەر و جێگری کارگێڕیی نەخۆشخانەی ئیبنوخەتیب و بەڕێوەبەری بەرگری شارستانی دەرکرد.

ئەمەش لە کاتێکدایە، شەوی شەممەی رابردوو، لە نەخۆشخانەی ئیبن خەتیب لە بەغدا ئاگرێک کەوتەوە و بەهۆیەوە ٨٢ کەس گیانیان لەدەست دا و زیاتر لە ١٢٠ کەسی دیکەش برینداربوون.

دوای رووداوەکەش، سەرۆکوەزیرانی عێراق بڕیاری دوورخستنەوەی وەزیری تەندروستی و پارێزگاری بەغدا و بەڕێوەبەری تەندروستی ناوچەی رەسافەی دەرکرد.

کۆدی هەواڵنێر: 60113