کوردپرێس:
هەفتەی ڕابردوو لە ئەنجامی هێرشەکانی تورکیا بۆ سەر خاکی کورد لە عێراق و سووریا، ژمارەیێک لە هاووڵاتییانی کورد لە شاری ڤیەنی پێتەختی وڵاتی نەمسا خۆپیشاندانی ناڕەزایییان ساز کرد و ژمارەیێک تورکی توندڕەو هەڵیانکوتایە سەر خۆپیشاندانەکان و گرژی و پێکدادانان لە نێوان هەر دوو لا دروست بوو.
سباستیەن کۆرتز ڕاوێژکاری باڵای وڵاتی نەمسا لەو بارەیەوە دەڵێت تورکیا هەوڵ دەدات نفووزی بە سەر هاووڵاتییانی دانیشتووی نەمسا بسەپێنێت و بیانکاتە ئامێر بۆ مەبەستی سیاسیی خۆی و لە چوارچێوەی گرژی و ململانێی ناوخۆی تورکیا بەکاریان بهێنێت.
ناوبراو جەختی کردەوە کە زووبەزوو پێویستە ئەم هەوڵانەی تورکیا بوەستێت.
ڕاوێژکاری باڵای نەمسا ئاماژەی بە ئاژاوەگێڕیی تورکەکانی ڤیەن لە خۆپیشاندانی کوردەکانی ئەو شارە کرد و گوتیشی: من باش دەزانم تورکیا مەبەستی چیە. تورکیا مەبەستیەتی بۆ بەرژەوەندیی خۆی هاووڵاتییانی تورکی دانیشتووی نەمسا بەکار بهێنێت و ئاژاوەیان پێبگێڕێت. ئەم گرژییانە لە تورکیاوە دەردەچن. ئەگەر ئێوە پێویستتان بە شەڕی سەرشەقامە دەبێت لە نێو خاکی تورکیا ئەم شەڕە بکەن.
Your Comment