کوردپرێس:
میدیاکانی عێراق و هەرێمی کوردستان باسی هێرشی داعشیان کردووە بۆ سەر پێشمەرگە و هێزە عێراقییەکان و سه‌رچاوه‌یێكی پێشمه‌رگه‌ش ئاشكرای ده‌كات، داعش په‌لامارى دوو ڕه‌بیه‌ى پێشمه‌رگه‌یان داوه و به‌هۆیه‌وه ژماره‌یێک پێشمه‌رگه شه‌هید و بریندار بوون، سه‌رچاوه‌یێكى ئه‌منییش له كه‌ركووك ڕایده‌گه‌یه‌نێت، "سه‌رجه‌م هێزه ئه‌منییه‌كانى ناو شاره‌كه خراونه‌ته حاڵه‌تى ئاماده‌باشییه‌وه".
به‌گوێره‌ى زانیارییه‌كان، ئه‌مڕۆ تیرۆریستانى داعش له‌سنوورى پارێزگاى كه‌ركووك و له‌سنووره‌كانى (پردێ، داقوق، ڕیاز) په‌لامارى پێشمه‌رگه و هێزه ئه‌منییه‌كانى دیكه‌ى عێراقیان داوه.
سه‌رچاوه‌یێكى پێشمه‌رگه له‌سنورى پردێ به‌شارپرێسى وت:"له به‌رزاییه‌كانى دبز (گوندى قایه‌باشى) تیرۆریستانى داعش په‌لامارى دوو ڕه‌بیه‌ى هێزه‌كانى (لیواى 10)ى پێشمه‌رگه‌یان داوه و ڕووبه‌ڕووبوونه‌وه‌یێكى سه‌خت ڕووی داوه".
ئه‌وه‌شى وت:"ئه‌گه‌رچى به‌دروستى ژماره‌ى شه‌هیده‌كان تائێستا نازانرێت، به‌ڵام به‌داخه‌وه ژماره‌یێک پێشمه‌رگه شه‌هید و بریندار بوون"، به‌وته‌ى سه‌رچاوه‌كه‌ى پێشمه‌رگه، ئه‌وه‌ى زانراوه ته‌نها یه‌كێك له‌شه‌هیده‌كانه كه پله‌ى نه‌قیبى هه‌یه و فه‌رمانده‌ى سریه‌یه به‌ناوى (پشتیوان زرارى).
سه‌رچاوه‌یێكى ئه‌منییش له كه‌ركووك به‌شارپرێسى وت:"هه‌ر ئه‌مڕۆ تیرۆریستانى داعش له‌سنوورى گوندى مه‌تاره له‌قه‌زاى داقوق و له‌ناحیه‌ى ڕیازی سه‌ر به‌قه‌زاى حه‌ویجه له كه‌ركووك، داعش په‌لامارى هێزه ئه‌منییه‌كانى عێراقى داوه".
به‌وته‌ى سه‌رچاوه‌كه، له‌ناوشارى كه‌ركووك سه‌رجه‌م هێزه ئه‌منییه‌كان خراونه‌ته حاڵه‌تى ئاماده‌باشییه‌وه.
Your Comment