کوردپرێس:
پەرویز ئیدەپوور قایمقامی شاری پاوە لە لێدوانێکدا بە کوردپرێسی وتووە جووڵەی بازرگانی لە دوو دەروازەی شێخ سڵە و شۆشمێوە لە ئاستێکی باشدا بەردەوامە و ڕۆژانە 200 بارهەڵگر لە ئەو دوو سنوورەوە بەرەو بازاڕەکانی عێراق و هەرێمی کوردستان ڕەوانە دەکرێت.
قایمقامی شاری پاوە گوتیشی ئەو ڕێژەیە لە ئاڵوگۆڕی بازرگانی لەو سنوورانەوە هەڵکشانی زۆری بەخۆوە بینیوە و ئومێد دەکرێت بە پەرەپێدانی ژێرخانەکان و ئامادەکردنی زەمینەی پێویست، جووڵەی بازرگانی لەو سنوورەوە پەرەی زیاتری پێبدرێت.
شایانی باسە دوو دەروازەی شێخ سڵە و شۆشمێ دەکەوێتە سنووری هەڵەبجە و هاوسنوورە لەگەڵ پارێزگای کرماشان و ناوچەی هەورامان لە ئێران. ئەمساڵی زایینی لە سەر فەرمانی دەوڵەتی ناوەندیی عێراق بە فەرمی کرایەوە و ئێستاش کار دەرکێت بۆ فراوانکردنی ژێرخانی پێویست بۆ ئەو دەروازە سنوورییانە.
Your Comment